Комментари хушас

Чӳк уйӑхӗн 13-мӗшӗнче Шупашкарта Чӑваш тӗррин музейӗнче чӑваш тӗррин пӗрремӗш урокӗ иртрӗ.

Чӑваш тӗррин наци шкулне савӑнӑҫлӑ лару-тӑрура уҫрӗҫ. ЧР культура министрӗ Светлана Каликова палӑртнӑ тӑрӑх, ҫак шкула уҫасси республика ертӳҫи Олег Николаев каланинчен пуҫланнӑ, "Чӑваш тӗрри республикӑри кашни района, кашни яла ҫитмелле", - тенӗ вӑл. Чӑнах та ҫапла пуласса шанас килет.

Ҫак ӑсталӑха вӗренес текен нумай иккен. Хальлӗхе 2 ушкӑн йӗркеленӗ. Анчах урока ҫырӑнас текенсем татах та пур-мӗн.

Пӗлӳ илме пысӑк туртӑм пулсан ҫын вӑрӑм ҫула та ним ӳркенмесӗрех парӑнтарӗ. Акӑ Хӗрлӗ Чутай районӗнче пурӑнакан Ольга Логинова инҫе ҫула пӑхмасӑр кашни занятине ҫӳреме палӑртнӑ. Унӑн тӗллевӗ пархатарлӑ: ҫӗвӗҫ профессине алла илнӗскер тӗрӗ ӑсталӑхне вӗренсе ҫак пӗлӗве районта та сарасшӑн.

75 ҫулти Нимфадора Архипова тӗрӗ шкулӗ уҫӑласса пӗлсенех занятисене ҫырӑннӑ. "Эпӗ чӑваш вӗт-ха, манӑн хамӑрӑн тӗрӗ ӑсталӑхне пӗлмеллех", - тет вӑл. Нимфадора Ивановна вӗренӗве ҫырӑннисенчен чи асли. Чи кӗҫӗн вӗренекен вара 13-ре.

Палӑртма кӑмӑллӑ, "Хыпар" Издательство ҫуртӗнче ӗҫлекен Ольга Калитова та - пӗрремӗш вӗренекенсен йышӗнче. Ӑста алӑллӑскер пур ӗҫе те тӗплӗн пурнӑҫлать. Халӗ вара ҫак занятисене ҫӳресен унӑн тахҫанхи ӗмӗчӗ пурнӑҫланӗ - вӑл чӑваш тӗррин ӑсталӑхне алла илӗ.

Занятисем 2022 ҫулхи нарӑсӑн 12-мӗшӗнче вӗҫленӗҫ. Унта хутшӑннисем сертификатлӑ пулӗҫ.

www.hypar.ru Лариса Петрова сăн ÿкерчĕкĕсем