Студентсен кунĕнче парне — çĕнелнĕ общежити
![](http://hypar.ru/sites/default/files/pictures/news/title/2021/01/obshchaga3.jpg)
Юсав ĕçĕсем иртнĕ хыççăн И.Н.Ульянов ячĕллĕ Чăваш патшалăх университечĕн 2-мĕш общежитийĕ уçăлчĕ. Унта медицина факультетĕнче ăс пухакан 320 студент пурăнĕ.
Çĕнелнĕ общежитие Студентсен кунĕнче уçни хăйне евĕр. 1962 çулта хăпартнă çурт пач улшăннă: халĕ вăл 6 хутлă, лифт пур. Студентсен пÿлĕмĕсем те пысăкрах, кашнин валли занятие хатĕрленмешкĕн уйрăм сĕтелпе пукан вырнаçтарнă. Тепĕр çĕнĕлĕх: интернета кĕме Wi-Fi пур. Икĕ е виçĕ пÿлĕм валли пĕр душ кабини, санузел, пысăках мар кухня /унта холодильникпе плита лартнă/. Кашни хутра кĕпе-йĕм çумалли, якатмалли пÿлĕм пур.
Студентсем валли кану вырăнĕ те йĕркеленĕ. Пĕрремĕш хутра спорт тата акт залĕсем, вулавăш пур. Общежитие кĕнĕ çĕрте биометрика терминалĕ вырнаçтарнă: вăл ÿт температурине виçет. Ăна ЧПУн студенчĕсемпе преподавателĕсем шухăшласа кăларнă.
Палăртмалла: юсав ĕçĕсене «Вĕрентÿ» наци проекчĕпе килĕшÿллĕн ирттернĕ. Федераци бюджетĕнчен — 139 млн тенкĕ ытла, университет 18 млн тенкĕ ытла уйăрнă.
www.hypar.ru Ирина КОШКИНА сăн ÿкерчĕкĕсем.
![](http://hypar.ru/sites/default/files/pictures/news/2021/01/obshchaga1.jpg)
![](http://hypar.ru/sites/default/files/pictures/news/2021/01/obshchaga2.jpg)