Комментари хушас

Чăвашсем — Раççейре пысăк йышлă халăхсенчен пĕри. Вĕсем çут çанталăк панă пултарулăхпа, кĕвĕ-çемме юратнипе уйрăлса тăнине чылай ăсчахпа çулçÿревçĕ палăртнă. Юрă чăвашпа юнашарах пулнă: йăлара та, ĕçре те, уявра та. Музыка искусстви халăхăн ăсне, кăмăлне, шухăшне палăртнă.

Чăваш кĕнеке издательстви «Чувашская музыкальная литература. Часть 1. «Традиционная музыкальная литература» вĕренÿ хатĕрĕ пичетлесе кăларнă. Авторĕ — Л.И.Бушуева. Ачасен музыка тата искусство шкулĕсем валли хатĕрленĕ пособире халăхăн музыка культурин хăйевĕрлĕхне уçса паракан самантсене çутатнă. Автор çавăн пекех халăх юррисене жанрсем — çурхи вăйă, хăна, туй тата ытти те — тăрăх пайласа тухнă.

Кĕнекере чăваш халăх музыка инструменчĕсемпе те — хăма купăспа, сăрнайпа, кавалпа, ыттипе — паллашма май пур. Кунта çавăн пекех халăх юррисен ăстисем, инструментпа калакан маçтăрсем /Эмине, Чăваш Хвети, Якур, Гаврил Федоров, Ираида Вдовина/ çинчен те çырса кăтартнă. Кăларăмра аудиодиск та пур, унта кĕнекере хускатнă темăсемпе çыхăннă юрăсемпе кĕвĕсене вырнаçтарнă.

Ольга ФЕДОРОВА,

Чăваш кĕнеке издательствин ертсе пыракан редакторĕ.