Комментари хушас

Чăваш наци конгресĕ тата ЧР Вĕренÿпе çамрăксен политикин министерстви йĕркеленĕ «Чăвашлăха аталантаракан чи лайăх шкул» конкурс пĕтĕмлетĕвĕ чÿк уйăхĕн 24-мĕшĕнче Шупашкарти 10-мĕш шкулта иртрĕ.

Республикăра çамрăк ăрăва ăс-хакăл тата кăмăл-сипет енчен аталанма, чăваш халăхĕн ырă йăли-йĕркине хисеплеме çул уçакан шкул чылай. Вĕсен йышĕнчен «Чăвашлăха аталантаракан чи лайăх шкул» конкурсра пĕрремĕш вырăна — Шупашкар хулинчи 10-мĕш шкул, иккĕмĕш вырăна — Йĕпреç районĕнчи Пучинкери тата Шупашкарти 60-мĕш шкулсем, виççĕмĕш вырăна Муркаш районĕнчи Калайкасси шкулĕпе Çĕнĕ Шупашкарти 18-мĕш лицей тухрĕç.

Çĕнтернĕ шкулсене саламлама ЧР вĕренÿпе çамрăксен политикин министрĕ Юрий Исаев тата ЧНК президенчĕ Николай Угаслов килсе çитрĕç. Чыславра «Чăвашлăха аталантаракан чи лайăх шкул» конкурса хастар хутшăннă Катекри /Канаш районĕ/, Юнтапари тата Чăваш Сурăмри /Элĕк районĕ/, Шăмăршăри, Куславкка хулинчи 3-мĕш, Çирĕклĕ Шăхальти /Елчĕк районĕ/, Тĕрлемесри /Куславкка районĕ/, Шупашкарти 50-мĕш, 62-мĕш, Елчĕкри /Куславкка районĕ/, Сăнав поселокĕнчи /Çĕрпÿ районĕ/, Канашри 3-мĕш шкулсене Дипломпа чысларĕç.

Çамрăк ăрăва ăс-хакăл тата кăмăл-сипет енчен аталантарассинче пысăк çитĕнÿсем тунăшăн Чăваш Республикин Пуçлăхĕн Тав хутне тата Чăваш наци конгресĕн укçа сертификатне Çĕнĕ Шупашкарти 18-мĕш лицейĕпе Муркаш районĕнчи А.Г.Николаев ячĕллĕ Калайкасси шкулĕ /15 пин тенкĕ/, Йĕпреç районĕнчи Пучинке шкулĕпе Шупашкарти 60-мĕш шкул /25 пин тенкĕ/, Шупашкарти А.Г.Николаев космонавт летчик ячĕллĕ 10-мĕш шкул /50 пин тенкĕ/ илме тивĕç пулчĕç.

Мал ĕмĕтлĕ вĕрентекенсем хăйсен пултарулăхне Раççей шайĕнчи конкурссенче те кăтартаççĕ. Çĕнĕ Шупашкарти 6-мĕш гимназири чăваш чĕлхи тата пуçламăш класс вĕрентекенне Нелли Красновăна Мускавра иртнĕ «Тăван чĕлхе вĕрентекенсен Пĕтĕм Раççейри мастер-класĕ» конкурс çĕнтерÿçине, Чăваш Республикин Пуçлăхĕн Тав хутне тата Чăваш наци конгресĕн 10 пин тенкĕлĕх сертификатне пачĕç.

Юлия Анисимова,

ЧНКн вĕренÿпе ăслăлăх комитечĕн председателĕн заместителĕ