Комментари хушас

Сăн-пите тимлĕ сăнаса организм çинчен питĕ нумай пĕлме пулать. Танлаштарса пăхар-ха.

Куç хупанкисем тăртаннă. Ку час-часах пулсан сăлтавĕ щит евĕрлĕ пар сывах маррипе çыхăнма пултарнă. Е çак тĕслĕх - пÿре çитменлĕхĕн палли. Сывлăха тĕрĕслеттермелле.

Куçсем путса кĕнĕ, куç айĕнчи ÿт çакăнса тăрать. Ывăнатăр е ыйхă вĕçнипе аптратăр пулсан хура чейпе компресс хуни пулăшать. Сăлтавĕ çакăнта мар-тăк аллерги тата гипертони пуррипе çуккине тĕрĕслеттермелле. Куç таврашĕнчи ÿт çинче сарă пăнчăсем пурри юнри холестерин шайĕ пысăккине систерет. Чĕре чирлесрен асăрханма унăн шайĕ мĕнлине пĕлни пĕлтерĕшлĕ.

Ÿт сарă - пĕвер чирлĕ? Ку кăна мар, щит евĕрлĕ пар тĕрĕс ĕçлемесен те пит саралать. Е ытти ... Сăлтавне тухтăр çеç палăртма пултарать. Пит çунса тухас пек хĕрлĕ пулни вара - час-часах II тип диабет палли, ку уйрăмах 50-ран иртнĕ хĕрарăмсен пулать.

Ахаль шатрасем. Кашнин - хăйĕн сăлтавĕ. Шатрасем час-часах апат ирĕлтерекен тытăм е гормон тытăмĕ йĕркеллех ĕçлеменнине палăртаççĕ. Çамрăк хĕрарăмсен вĕсем уйăх хушши циклĕ пăсăлсан е контрацептивсем юрăхлă пулмасан тухаççĕ. Аслă çулсенчи хĕрарăмсемпе арçынсен инфекци е аллерги пуррине палăртаççĕ.

Пÿрлешке /акне/. Вăл çу парĕсен ĕçĕ пăсăлсан аталанать. Çавна пула ÿт шыçать. Сăлтавĕ тĕрлĕрен. Пÿрлĕ пысăк пÿрлешкесем час-часах çул çитмен çамрăксене тапăнаççĕ. Çак амакран питĕ тимлĕ сипленмелле. Пÿрлешкесене пусса кăларма тата вĕсенчен харпăр хăй тĕллĕн сипленме юрамасть.

Купероз. Пит çинче вĕтĕ юн тымарĕсем çăлтăр е сетка евĕр курăнма пуçлаççĕ. Сăлтавĕ - капиллярсен стенкисем вăйсăр пулни. Çак тĕслĕхре мунча, сауна кĕме, эрех-сăра ĕçме юрамасть.

Тур палли, папиллома, шĕ¬пĕн, кератома. Кашни çыннăнах çаксенчен хăшĕ те пулин пур. Вĕсенчен хăвăр тĕллĕн сипленме юрамасть. Ÿте папилломăсем тухсан вĕсене кастармалла, анчах тухтăрпа канашланă хыççăн кăна.