Çичĕ халăх уявĕ

Авăн уйăхĕн 29-мĕшĕнче республикăри халăх пултарулăхĕн центрĕнче наци культурисен «Çичĕ чечек» фестивалĕ иртнĕ.

Трактор тăвакансен культура керменĕн ĕçченĕ Василий Сорокин пĕлтернĕ тăрăх — уява тĕрлĕ регионтан 100 ытла çын хутшăннă. Чăваш, вырăс, пушкăрт, тутар, çармăс, ирçе, удмурт халăхĕсен пултарулăх коллективĕсем уява илемлĕ юрри-ташшипе пуянлатнă, хăйсен йăли-йĕркипе паллаштарнă, вĕсен хитре тĕрри-эрешне куракансем хак панă. Культура керменĕн тĕп сцени çине Тутарстанри «Лейсан», Мари Элти «Савак кундем», Чулхулари «Чарочка», Мордовири «Морамо» тата Чăваш Енри «Кăмăл» ансамбльсем тухнă.