Ватти-вĕтти старта тухать

«Кашни çынах табак туртма, ĕçкĕпе иртĕхме пăрахма, тĕрĕс мар апатланасран асăрханма, физкультурăпа тата спортпа туслашма пултарать. Сывлăха лайăх шайра тытма уçă сывлăшра куллен çур сехет уçăлса çÿрени те çителĕклĕ. Ăна тума хаклă тăракан инвентарь е хатĕр-хĕтĕр кирлĕ мар.

Физкультурăпа сывă апатлану хальхи пурнăçăн уйрăлми пайĕсем пулса тăнине ашшĕ-амăшĕн хăйĕн тĕслĕхпе кăтартса памалла. Ачасене йăлана кĕнĕ çемье хаклăхĕсене хисеплеме тата сывă пурнăç йĕркине тытса пыма мĕн пĕчĕкрен вĕрентсе ÿстермелле», - тенĕ ЧР Пуçлăхĕ Михаил Игнатьев Патшалăх Канашне янă Çырура.

Вăрмар районĕнчи Энĕшпуç ял тăрăхĕнче çак сăмахсене асра тытни куçкĕретех. Кунта спортпа туслă çынсем пурăнаççĕ. Ял тăрăхĕн пуçлăхĕ Олег Иванов хăй те спорта кăмăллать. Ахальтен мар вăл пĕлтĕр Сочире иртнĕ ветерансен хушшинчи ăмăртăва хутшăннă. Çук, ветеран мар вăл. Пултаруллă, спортра пысăк ÿсĕмсем тунăран ăна çак ушкăна йышăннă.

Асăннă ял тăрăхĕнче çулсеренех тĕрлĕ ăмăрту иртет. Унта шкул ачисем те, «Радуга» ача садне çÿрекенсем те хутшăнаççĕ. Аслă ăру та çамрăксемпе тан. Акă Мария Сытина 74 çулта пулин те пĕр ăмăртуран та юлмасть. Сăмах май, Мария Васильевна - Олег Анатольевичăн амăшĕ. Районти ăмăртусене те хутшăнать вăл, яланах малти вырăнсене йышăнать. Валентина Петровăпа Сергей Ильин та çичĕ теçеткерен иртнĕ. Вĕсем те тĕрлĕ ăмăртура час-часах ял тăрăхĕн чысне хÿтĕлеççĕ.

Энĕшпуçсем спортăн тĕрлĕ енне кăмăллаççĕ. Хĕлле йĕлтĕрпе чупаççĕ, çулла çăмăл атлетикăна парăнтараççĕ, футболла та ăста выляççĕ. Çакна ял тăрăхĕн пуçлăхĕн пÿлĕмĕнчи Хисеп хучĕсем, кубоксемпе медальсем çирĕплетеççĕ. Вĕсен шучĕ те çук. Кашнинех тар тăкса тивĕçнĕ. Вĕсен шутĕнчех федерацин Атăлçи округĕнчен пани те пур.

Спорта аталантарма майсем çителĕклĕ. Иртнĕ çул вĕçĕнче шкулти спортзала юсаса çĕнетнĕ. Кунта халĕ занятисем иртнĕ хыççăн кĕрсе чÿхенмешкĕн душ пÿлĕмĕсем те пур. Кĕлеткене вăй кĕртме спортзала вĕренекенсем çеç мар, ял çамрăкĕ те çÿрет. Культура паркĕнче те спортпа туслашма хатĕр-хĕтĕр пур.

Кашни çулах Энĕшпуç ял тăрăхĕнче Геннадийпе Юрий Ивановсене СССР спорт мастерĕсене асăнса йĕлтĕр ăмăртăвĕ иртет. Кăçал ăна вунпиллĕкмĕш хут йĕркеленĕ. Ял картинчен тухса район, республика шайне çĕкленнĕ вăл. Унта ватти-вĕтти хутшăнать. Ача садĕнчи шăпăрлансем таранах.

Çĕнтерÿçĕсемпе призерсене ял тăрăхĕ ятарлă медальсемпе, Хисеп хучĕсемпе тата парнесемпе чыслать.

Афинăри тата Пекинри Олимпиадăна хутшăннă Светлана Захарова çак тăрăхра çуралса ÿсни те пĕлтерĕшлĕ. Ун ячĕпе районта çулсерен ăмăрту ирттереççĕ. Энĕшпуçсем унта та хастар хутшăнаççĕ.

Спорт çамрăкшăн та, çулланнă çыншăн та пĕлтерĕшлĕ пулнине ăнланаççĕ вĕсем. Ватăсем çамрăк ăруран, çамрăксем аслисенчен юласшăн мар. Çавна май пурте старта тăраççĕ. Ял-йыша хавхалантаракан пурах: ял тăрăхĕн ертÿçи ку тĕлĕшпе пурне те «чирлеттернĕ». Çемйипех тĕрлĕ ăмăртăва хутшăнаççĕ. Виçĕм çул Ивановсем республикăра иртнĕ «Атте, анне тата эпĕ - спорт çемйи» мероприятире пĕрремĕш вырăна тухнă.

Вырăнти шкултан вĕренсе тухнисем хушшинче спортăн тава тивĕçлĕ икĕ мастерĕ, 20 мастер, 15 кандидат, çĕр-çĕр разрядник тата спорта юратакансем. Пĕтĕм кăтарту куç умĕнче. Эппин, ыр ут хыççăн пин ут шыв ĕçет тени тĕрĕсех.

Валентина ПЕТРОВА.

Сăнÿкерчĕке www.cap.ru сайтран илнĕ