Упа та, тилĕ те килĕ кунта...

Вăрмар районĕнчи Арапуç шкулĕнче тăваттăмĕш класра вĕренекенсем паян та ытти кунсенчи пекех хаваслă! Ара, умра Çĕнĕ çул-çке! Çак уява асра юлмалла ирттерес тĕллевпе хаваслă ушкăн класри чăрăша илемлетрĕ, кантăксем те вĕсем тăрăшнăранах тĕрлĕ тĕслĕ «юр пĕрчипе» хупланчĕç.

— Чимĕр-ха, ачасем! Çĕнĕ çул хăнине Хĕл Мучие ытти çĕршывра епле чĕнеççĕ-ши? — тесе вĕренÿ отличникĕ Маша Петрова сĕтел çинчи глобуса самантрах ярса илчĕ те ăна çавăрттарма тытăнчĕ. — Акă Финлянди çĕр-шывĕ. Унта ачасене пылак кучченеçпе савăнтараканĕ, юрă-сăвăпа кăмăлĕсене уçаканĕ — Йоулупукки.

— Тĕрĕс! Испанири Папа Ноэль те уява чăтăмсăр кĕтекенсене тĕлĕнтермĕшсемпе савăнтарĕ. Кашни ачан ĕмĕтне пурнăçа кĕртес тесе пĕтĕм вăй-халне шеллемессе шансах тăратăп, — пырса тăчĕ ун патне тантăшĕ Настя Руссанова.

Уйрăлми туссен калаçăвне илтнĕ Костя Спиридонов та вĕсем патне вас-каса çитрĕ.

— Узбекистанри Корбобо та Çĕнĕ Çул каç хĕр ачасемпе арçын ачасене хавас кăмăл парнелĕ. Чим, туссем, эсир хамăрăн юратнă Хĕл Мучи кĕлеткине юртан туса лартма ĕлкĕртĕр-и? Праçникре пÿлĕмсенче çеç мар, урамра та капăрлăх хуçалантăр! Ялсенче те уявра чăрăшсем чăвашла çутатчăр, ачасем чăвашла юрă юрласа сăвă калатчăр, — терĕ Костя сăмах çăмхине хавасланса та хăпартланса сÿтнĕ май. — Пирĕн, чăваш ачисен, атте-анне чĕлхине упраса хăвармаллах. Кун пирки класс ертÿçи те тăтăш аса илтерет. Апла тăк уявра та эпир те чăвашла çеç сăвă калăпăр, ташлăпăр, юрлăпăр. Килĕшмелле-и? Калаçса татăлтăмăр-и?

Шавларĕ çеç класс, пĕри те тепри ăмăртмалла Çĕнĕ çула халалласа сăвă калама тытăнчĕç. Ку ĕнтĕ хăйне евĕр репетици пулчĕ.

— Чим, уяв каçĕнче кам пуласшăн эсĕ? — тесе ачасем пĕр-пĕрне çине-çинех ыйту пачĕç.

...Акă кĕтнĕ кун çитĕ те чăрăш тавра «Упасем», «Мулкачсем», «Тилĕсем» тата ытти чĕрчун çаврăнма та тытăнĕ.

Элиза ВАЛАНС.

Вăрмар районĕ, Арапуç шкулĕ.

 

Элиза ВАЛАНС

Комментари хушас

Image CAPTCHA
Введите символы, которые показаны на картинке.