«Шупашкар спорт хули пулнине пурте пĕлччĕр»

Ĕнер Правительство çуртĕнче «Раççей - спорт çĕр-шывĕ» форума тата Раççей Президенчĕ çумĕнчи физкультурăпа спорта аталантарас енĕпе ĕçлекен Канашĕн ларăвне хатĕрленсе ирттерес енĕпе ĕçлекен республикăри йĕркелÿ комитечĕн черетлĕ ларăвĕ иртрĕ. Унăн ĕçне Чăваш Ен Пуçлăхĕ Михаил Игнатьев хутшăнчĕ.

Ларура виçĕ ыйту пăхса тухрĕç. «Раççей - спорт çĕр-шывĕ» Пĕтĕм тĕнчери спорт форумĕ иртнĕ кунсенче хăнасене кĕтсе илес, халăха транспортпа тивĕçтересси пирки ЧР транспорт тата çул-йĕр хуçалăхĕн министрĕ Владимир Филиппов пĕлтерчĕ. Владимир Иванович каланă тăрăх - юпа уйăхĕн 10-11-мĕшĕсенче Мускавран Шупашкара хушма рейссем уçĕç. Тĕп хулана пуйăспа 800 çын килмелле, Канашри чукун çул вокзалĕнче 850 çынна кĕтсе илмелле. Автомобильсемпе 200 çын /11 делегаци/ килсе çитмелле. Аэропортра, чукун çул вокзалĕнче тата автовокзалта хăнасене ятарлă çынсем, волонтерсем кĕтсе илĕç. Вĕсем валли справка тата диспечер службисем йĕркелĕç. Кашни транспорт çинче форум логотипĕ пулĕ. Халăха турттарма лайăх, хăтлă автобуссене уйăрĕç. «Канашран автобус сехет ытла килет. Çав вăхăтра хăнасем ан тунсăхлаччăр, вĕсене республика аталанăвĕпе, чăваш халăх йăли-йĕркипе, культурипе, историпе паллаштаракан фильмсем кăтартасчĕ», - сĕнÿ пачĕ Михаил Васильевич.

ЧР экономика аталанăвĕн, промышленноç тата суту-илÿ министрĕ Владимир Аврелькин сувенир продукцийĕ, форум логотипĕпе усă курса хатĕрленĕ спорт тумĕ пирки каласа пачĕ. Владимир Иванович пĕлтернĕ тăрăх - форума хутшăнакансем валли керамикăран ятарлă турилккесем хатĕрленĕ. Шупашкарти кашни хăна çуртĕнчех сувенирсем валли ятарлă вырăн уйăрнă. Унтах чăваш наци çи-пуçĕпе те паллашма пулать. «15 алă ăсти куравсене хутшăнма кăмăл тунине пĕлтерчĕç. Тĕп хулари çĕвĕ фабрикисем волонтерсем валли ятарлă тумсем çĕлеççĕ. Вĕсене хулари спорт лавккисенче те, хăна çурчĕсенче те сутĕç. Футболкăсем те, ытти çи-пуç та ытла хаклă пулмĕç»,- терĕ Владимир Александрович. Шупашкар хулин пуçлăхĕ Леонид Черкесов вара форума хутшăнакансем валли ятарлă паллăллă /логотиплă/ калпаксем тата шарфсем хатĕрлени çинчен пĕлтерчĕ. Волонтерсем валли вара галстуксем, çумăрта тăхăнмалли пĕркенчĕксем /дождевик/, сумкăсем хатĕр. Çавăн пекех эспандер та, шагомер та, шăхлич те, скакалка та, ялав та, магнитик та, флеш карта та, алă шăлли те пур. Вĕсем çинче - форум логотипĕ. «Халĕ хулари кашни садикрех, кашни шкултах «çăлтăрпа» ирхи зарядка тăваççĕ. Кашни вĕренÿ заведенийĕнчех футболла, баскетболла выляççĕ. Кунсăр пуçне «Атте, анне тата эпĕ - спорт çемйи» ăмăртусем ирттереççĕ. Хулари картишсенче канмалли кунсенче тупăшусемпе спорт вăййисем йĕркелеççĕ. Пĕлÿ çурчĕсенче ачасем спорт, «Раççей - спорт çĕр-шывĕ» Пĕтĕм тĕнчери спорт форумĕ, паллă спортсменсем пирки сочиненисем çыраççĕ. Шупашкар спорт хули пулнине пурте пĕлччĕр», - шухăшне палăртрĕ Леонид Ильич. Сăмах май, спорт форумĕ вăхăтĕнче хулара иртекен мероприятисене пурĕ 45000 ача хутшăнмалла. Вĕсене пурне те сувенир продукцийĕпе хавхалантарĕç.

ЧР вĕренÿ тата çамрăксен политикин министрĕ Владимир Иванов пĕлтернĕ тăрăх - спорт форумне йĕркелесе ирттерме волонтерсем - пурĕ 495 çын - пулăшĕç. Вĕсем - Шупашкарти аслă шкулсемпе колледжсенче пĕлÿ илекенсем. Вĕсемпе ятарлă занятисем ирттернĕ ĕнтĕ, графикпа, ĕç йĕркипе паллаштарнă. И.Я.Яковлев ячĕллĕ педуниверситетри 40 çын /вĕсем тĕрлĕ чĕлхене пĕлеççĕ/ пысăк хăнасене кĕтсе илĕç. Владимир Николаевич каланă тăрăх - волонтерсенчен ытларахăшĕ Хусанта иртнĕ спорт форумĕн, Сочири Олимп вăййисен ĕç-хĕлне хутшăннă. Опыт та, ăсталăх та пур темелле. Çав вăхăтрах çак кунсенче волонтерсен пĕр ушкăнĕ Хусанта иртекен ятарлă конференцие хутшăнмалла.

Роза ВЛАСОВА