САМĂРЛĂХРАН - КУРĂК ПУЛĂШНИПЕ

29 Çĕртме, 2016

Аппетита чакарма апатчен 20 минут маларах куккурус çÿçин шĕвекне стаканăн виççĕмĕш пайĕ чухлĕ ĕçмелле. 2 апат кашăкĕ куккурус çÿçине тин вĕренĕ 1 стакан шыва ямалла. Хупă савăтпа ăшăра 15 минут лартмалла, сăрăхтармалла. Темиçе курс ирттермелле. Кашнинчех тăватă эрне сипленнĕ хыççăн 10-шар кунлăх тăхтавсем тумалла.
Апатчен çур сехет маларах курăк чейĕ ĕçмелле. 2,5-ер чей кашăкĕ вĕтетнĕ календула чечекĕпе куккурус çÿçине, 2-шер чей кашăкĕ сар çип утипе /зверобой/ шăлан çырлине, 1-ер чей кашăкĕ йĕтĕн вăррипе пĕтнĕк /мята перечная/ çулçине, 2 апат кашăкĕ сарă кушак урин /бессмертник песчаный/ чечекне хутăштармалла. 1 апат кашăкĕ пухха тин вĕренĕ 1 стакан шыва ярса чей пек пĕçермелле.
3 апат кашăкĕ укроп вăррине, 1,5-шер чей кашăкĕ вĕтетнĕ çăкапа календула чечекĕсене, 2 чей кашăкĕ упа çырлин /бузина черная/ чечекне, 2 чей кашăкĕ пĕтнĕк çулçине хутăштармалла. 2 апат кашăкĕ пухха тин вĕренĕ 3 стакан шыва ямалла, 30 минутран сăрăхтармалла. Кунне 3 хут 1-ер апат кашăкĕ ĕçмелле.
Самăрлăх аптратнă чухне хывăх усăллă. Апата хушиччен ăна исленме тин вĕренĕ шыва 30 минута ярса лартмалла. Унтан шывне тăкмалла. Пулнă пăтта кирек мĕнле апата яма юрать. Малтан кунне 2-3 хут — 1-ер чей кашăкĕ, 7-10 кунран — 2-шер чей кашăкĕ, тата 10 кунран 2-шер апат кашăкĕ хушма юрать.
Самăрлăхран хур урин /лапчатка гусиная/ шĕвекĕ хушнă ванна пулăшать. 50-100 грамм типĕ курăка 1 витре шыва ямалла, вĕреме кĕртмелле, вăйсăр çулăм çинче 15 минут вĕретмелле, сăрăхтармалла. Çак шыва хушнă ваннăра 20 минут выртмалла. Кашни 4 эрне хыççăн 10-шар кунлăх тăхтавсем тумалла.
Диетăна пăхăнмалла, рационра çу, углевод, тăвар виçине чакармалла. Каçхи апат — 19 сехетчен. Кирек мĕнре те виçелĕх кирлĕ. Ытларах хускалмалла, алкоголь ĕçмелле мар.

Сывлăх

Хÿтлĕх