Раççей ачисем - миршĕн!

Пĕтĕм Раççейри «Раççей ачисем - миршĕн» патриотизм акцийĕ çĕршывра март-май уйăхĕсенче иртрĕ. «Единая Россия» партин «Ача сачĕсем - ачасене» проектпа килĕшÿллĕн йĕркеленĕ конкурса Тăван çĕршывăн Аслă вăрçинче çĕнтернĕренпе 70 çул çитнине халалланă. Акцие Раççей регионĕсенчи шкулчченхи ÿсĕмри тата ача садне çÿрекенсем - пĕтĕмпе 18 пине яхăн - хутшăнчĕç. Чи нумай сасă пухнă ÿкерчĕксен «хуçисем» çĕнтерÿçĕсем пулса тăчĕç. Чăваш Республикинчен 12-ĕн мала тухнă. Вĕсем - Шупашкарти тата Çĕнĕ Шупашкарти, Комсомольски тата Хĕрлĕ Чутай районĕсенчи ача сачĕсене çÿрекен хĕр пĕрчисемпе арçын ачасем.

Çамрăк художниксене тĕп хулари 5-мĕш гимназире чаплă лару-тăрура чысларĕç. Çак ятпа йĕркеленĕ уява республика Пуçлăхĕн тивĕçĕсене вăхăтлăх пурнăçлакан Михаил Игнатьев, РФ Патшалăх Думин депутачĕ, "Ача сачĕсем - ачасене" парти проекчĕн ертÿçи Алена Аршинова, «Единая Россия» партин чăваш регион уйрăмĕн секретарĕ Николай Малов, ЧР вĕрентÿ министрĕ Владимир Иванов, Шупашкар хула пуçлăхĕ Леонид Черкесов, ЧР ачасен правин уполномоченнăйĕ Вячеслав Рафинов хутшăнчĕç.

Чи малтанах Алена Аршинова конкурс çĕнтерÿçисемпе кашнинпе уйрăммăн паллашса тухрĕ. Пĕчĕкскерсен аллисене чăмăртарĕ, малашне те туслă çыхăну тытма сĕнчĕ.

- Конкурса йĕркелеме Воронеж облаçĕнчи хастарсем сĕнчĕç. Çак регион çивĕч лару-тăрăва кĕрсе ÿкнĕ çĕршывпа чикĕллĕ пулнăран кунта вăрçă пыракан вырăнтан тарса килнисем нумайăн пурăнаççĕ. Вăрçă - япăх пулăм. Эпир - миршĕн, ăна упрасси - пирĕн тĕп тĕллев, - унтан Алена Игоревна пĕтĕм Раççей ырласа йышăннă акци епле пуçланни çинчен каласа кăтартрĕ. - Конкурс сайтне 18 пине яхăн ÿкерчĕк килчĕ. Федерацин Атăлçи округĕ уйрăмах хастар пулчĕ. Малти ретре - Пушкăрт, Чăваш, Мордва республикисем.

- Тăван çĕршывăн мухтавлă историне хисеплекен, ырă йăла-йĕркене малалла тăсакан ачасем пурришĕн мăнаçланни чун-чĕреме хăпартлантарать, - ЧР Патшалăх Канашĕн депутачĕ Николай Малов ачасем конкурса хастар хутшăнни савăнтарнине палăртрĕ. - Çамрăк ăрăва асатте-асаннесен ырă ĕçĕсене тĕпе хурса воспитани пама тăрăшмалла.

Чăваш Ен Пуçлăхĕн тивĕçĕсене вăхăтлăх пурнăçлакан Михаил Игнатьев чи малтан маттур ачасен ашшĕ-амăшне тав турĕ. «Специалистсем ачан ăс-хакăлне, пултарулăхне, тавракурăмне ултă çула çитиччен аталантарма сĕнеççĕ. Капла вĕсене пурнăçăн такăр мар çÿлĕпе утма çăмăлрах пулĕ. Куратăп: эсир ачăрсем хăвăртан лайăхрах пулччăр тесе тăрăшатăр. Пур енлĕн пулăшатăр, сĕнÿ-канаш паратăр, йывăрлăхсене çĕнтерме вĕрентетĕр. Эпир те, республика ертÿçисем, ку енĕпе май килнĕ таран мĕн пултарнине тума, кашниех хăйне хăтлă туйтăр, ачисен пуласлăхĕшĕн ан пăшăрхантăр тесе тăрăшатпăр, çамрăк ăрăва вĕренме, ĕçлеме, аталанма условисем туса паратпăр», - терĕ вăл.

«Раççей ачисем - миршĕн» акци çĕнтерÿçисене чыслама йĕркеленнĕ уяв ăшă калаçуллă «çавра сĕтеле» çаврăнчĕ. Ашшĕ-амăшĕ меллĕ самантпа усă курса республика ертÿçисене тĕрлĕ ыйту пачĕ. Чылайăшĕ юлашки вăхăтра нумай ачаллă çемьесене ытларах пулăшнине палăртрĕ, çакăншăн тав турĕ. Çав вăхăтрах çитменлĕх те çук мар. Сăмахран, патшалăх уйăрса паракан çĕр лаптăкĕсен таврашĕнче инфратытăм аталанманни. Ку енĕпе йĕрке тума пулмасть-ши? Çак ыйту, ахăртнех, нумайăшне шухăшлаттарать. Михаил Васильевич уçă калаçу çулне суйласа илчĕ: «Пытармастăп, бюджетра укçа-тенкĕ çитмест. Çапах та майĕпен нумай ачаллă çемьесене уйăрса паракан çĕр лаптăкĕсем патне шыв, çутă, газ çитерĕпĕр. Çак ĕçсене пурнăçлама та вăхăт çитет».

Уявăн чи пăлхануллă саманчĕ, паллах, пĕчĕккисене чыслани. Тĕлĕнтермĕш кĕтсе хавхаланнăскерсем пĕрин хыççăн тепри парне илме васкарĕç. Алена Игоревна çĕнтерÿçĕсене сертификат, Михаил Васильевич «Единая Россия» партин паллине - шурă упа çурине - тыттарсан пĕчĕксерсем çухалсах кайрĕç. Пысăк аппасемпе галстуклă пиччесен умĕнче именмесĕр те пултараймарĕç вĕсем. Ашшĕ-амăшĕ те парнесĕр юлмарĕ. Юлашкинчен пурте пĕрле асăнмалăх сăн ÿкерттерчĕç.

Пĕчĕккисем çак мероприятин пĕлтерĕшне ăнланмарĕç те ахăртнех. Куçĕсем вара савăнăçпа, телейпе çиçсе çуталчĕç. Çакă чи кирли! Апла-тăк çĕршывра вăрçă çук.

Валентина БАГАДЕРОВА