Пÿре чирĕпе аптăракансем валли Канашра гемодиализ центрĕ уçасшăн

Канаш хулинче çывăх вăхăтра гемодиализ центрĕ уçасшăн. Диализăн амбулатори центрне тăвасси хальхи вăхăтра унта малалла пырать. Ĕç-пуçпа иртнĕ эрнере, сăмах май, Чăваш Енĕн Министрсен Кабинечĕн Председателĕ Иван Моторин тата сывлăх сыхлав министрĕ Владимир Викторов паллашнă.

Пÿре чирĕпе аптăракансен юнне тасатмалли май хальхи вăхăтра Шупашкарти "Б.Браун Авитум Руссланд Клиникс" обществăн амбулатори центрĕнче тата Республикăри клиника больницин гемодиализ уйрăмĕнче пур. Республикăн Сывлăх сыхлав министерствинче пĕлтернĕ тăрăх, Канашра диализ центрĕ уçни Улатăр, Патăрьел, Вăрнар, Йĕпреç, Елчĕк, Канаш районĕсенче тата Канашпа Çĕмĕрле хулисенче пурăнакансемшĕн меллĕ.

Сывлăх сиплев учрежденийĕ 12 вырăнлă пулĕ. Малтанхи тапхăрта унта кунсерен 20-е яхăн пациента йышăнасшăн, кайран виçĕ хут ытларах çынна пулăшма тытăнасшăн. Центра кăçалхи çĕртме уйăхĕнче ĕçлеттерсе ярасшăн.

www.hypar.ru

Вера ТИТОВА. ЧР Сывлăх сыхлав министерствин сайтĕнчи сăн ÿкерчĕксем.

Комментари хушас