Олимп çулăмĕн эстафети - пысăк уяв

19 Раштав, 2013

Чăваш Енре Олимп çулăмĕн уявне пурте чăтăмсăррăн кĕтеççĕ. Эстафетăччен 8 кун кăна юлчĕ. Йĕркелÿçĕсем пĕлтерĕшлĕ мероприятие мĕнле хатĕрленни çинчен пресс-конференцире каласа пачĕç.

Унта ЧР физкультурăпа спорт тата туризм министрĕ Сергей Мельников, Шупашкар хула администрацийĕн пуçлăхĕн çумĕ Алексей Маклыгин, ЧР информаци политикипе массăллă коммуникацисен министрĕн çумĕ Любовь Шемарина, ЧР ÇÇХПИ пуçлăхĕ Владимир Романов, ШĔМĕн общество йĕркелĕхне сыхлас енĕпе ĕçлекен управленийĕн пуçлăхĕн çумĕ Сергей Рыбаков тата ыттисем хутшăнчĕç.

Эстафета маршручĕпе Алексей Маклыгин паллаштарчĕ. Олимп вăййисен тĕп символĕ кăнтăрла 12 сехетре чукун çул вокзалĕнче старт илĕ. Унтан хулан тĕп урамĕсемпе çула тухĕ: Ленин проспекчĕ, Андриян Николаев, Калинин, Текстильщиксен, Зоя Яковлева, Иван Франко урамĕсем, Юхан шывçăсен тÿремĕ, Константин Иванов урамĕ, Мускав, Максим Горький проспекчĕсем, Университет, Павлов мичман, Гузовский, Чул хула урамĕсем, Президент тата Электроаппаратчиксен бульварĕсем, Карл Маркс, Гагарин, Чапаев, Çĕрпÿ урамĕсем /тĕплĕнрех хула администрацийĕн сайтĕнче паллашма пулать/. Çавăн пекех хулари паллă вырăнсенче те пулĕ: Çĕнтерÿ паркĕ, юхан шыв порчĕ, Анне палăкĕ, кÿлмек хĕрри.

Алексей Юрьевич пĕлтернĕ тăрăх - эстафета виçĕ тапхăрпа иртĕ. Пĕрремĕшĕ - чукун çул вокзалĕнчен пуçласа Чăваш патшалăх университечĕн çурçĕр-хĕвел анăç районĕнче вырнаçнă корпусĕ патне çитиччен. Иккĕмĕшĕ - тĕп тапхăрсенчен пĕри - Хĕрлĕ лапам. Олимп çулăмне унта çуна çинче ларакан Хĕл Мучипе унăн хуралçисем илсе килĕç. Чăваш патшалăх драма театрĕ умĕнче чаплă концерт иртĕ. Сывă пурнăç йĕркине тытса пыракансем Хĕл Мучипе пĕрле зарядкăна тăрĕç, çĕр-шывĕпе палăрнă трактор-шоу çынсене тимĕр «урхамахсен» ăсталăхĕпе тĕлĕнтерĕ. Юлашки тапхăр - «Олимпийский» стадион, унта 18 сехетре пысăк та савăнăçлă уяв пуçланĕ.

Сергей Мельников министр çулăма пĕрремĕш йăтма Олимп чемпионкине Елена Николаевăна шаннине пĕлтерчĕ. Стадионта вара çулăма Олимп чемпионĕ, СССР спортăн тава тивĕçлĕ мастерĕ Владимир Воронков чĕртĕ. Вĕсемсĕр пуçне Олимп вăййисен тĕп символне 161 çын йăтĕ. Вĕсен йышĕнче РФ спортăн тава тивĕçлĕ мастерĕ, «Раççей-2» телеканалăн комментаторĕ Ольга Богословская та пур. Вăлах пирĕн республикăра Олимп çулăмĕн эстафети еплерех иртни пирки репортаж хатĕрлĕ. Çавăн пекех эстафетăна 1000 яхăн волонтер - спорт шкулĕн вĕренекенĕсемпе студентсем, хастар яшсемпе хĕрсем - хутшăнĕç.

Шупашкар хула администрацийĕн пуçлăхĕ 10 сехетрен пуçласа 22 сехетчен эстафета иртекен çулсемпе автомобильсене тата общество транспортне вăхăтлăха çÿреме чарасси çинчен йышăну кăларнă. Çавăнпа йĕркелÿçĕсем çул çине автомобильсĕр тухма ыйтаççĕ, çавна май раштавăн 27-мĕшне çуран çÿремелли кун тесе палăртнă. «Енчен те эстафета иртекен урамсенче тăватă кустăрмаллă тусăра лартса хăваратăр тăк - ăна штрафстоянкăра шырама тивĕ», - асăрхаттарчĕ ЧР ÇÇХПИ пуçлăхĕ Владимир Романов. Каласа хăвармалла: çав кун полицин 2000 яхăн ĕçченĕ йĕркелĕхшĕн яваплă пулĕ. Тепĕр çĕнĕлĕх - чылай предприятипе организацире ĕçлекенсем валли канмалли кун тума сĕннĕ. 5-11-мĕш классенче вĕренекенсем валли спортпа сывлăх кунĕ иртĕ, çав вăхăтрах ача сачĕсемпе пуçламăш шкулсем малтанхи графикпах ĕçлĕç. «Олимп çулăмĕн эстафети республика кун-çулне кĕрсе юлмалли уяв, çавăнпа вăл йĕркеллĕ ирттĕр», - пĕтĕмлетрĕç юлашкинчен пресс-конференцие хутшăнакансем.

 

Андрей МИХАЙЛОВ

Комментари хушас

Image CAPTCHA
Введите символы, которые показаны на картинке.