Ĕне хырăмне хăяр пăсмĕ

Иртнĕ çул хăяр йăтăнса пулнăччĕ. Ниçта хума çуккипе питĕ нумай тăварларăм. Хамăр вара хĕл каçипе те темиçе банка кăна пушатрăмăр. Уксуспа тăварланă хăяра пĕтĕ ĕнене çитерме юрать-и? Ĕне июнь уйăхĕнче пăруламалла.

Нина Ильина. Сĕнтĕрвăрри районĕ, Этнескер.

- Хăвăра валли çиме тăварланă хăяр ĕне хырăмĕшĕн те пăсăк пулас çук. Хăяр шывĕ хырăмлăха лайăхрах ĕçлеттерме çеç пулăшĕ. Ăна шыва хушса памалла. Кунне пĕрер банка (3 л) çитерсен çитет, - тесе пĕлтерчĕ пире Юрий Николаев ветеринар. - Пăнтăхса кăвакарни кăна ан пултăр. Унсăрăн ĕне наркăмăшланма пултарать.