Хисеплĕ ветерансем, сире вăрăм кунçул сунатпăр!

Чăваш Ен Пуçлăхĕ Михаил Игнатьев май уйăхĕн 7-мĕшĕнче ЧР Сывлăх сыхлавĕпе социаллă аталану министерствин «Шупашкар хулинчи халăха социаллă пулăшу паракан комплекслă центра» çитсе унти лару-тăрупа паллашрĕ, хевтесĕрсемпе сусăрсем валли хăтлă условисем туса панипе кăсăкланчĕ, музейре пулса аваллăх управçисен ĕçне тивĕçлипе хакларĕ.

Сăмах май, Михаил Васильевич сывлăх сыхлавĕпе социаллă учрежденисенче сиплевпе тата патшалăх пулăшăвĕн мерисемпе çăмăллăх ирĕкĕ пуррисене тивĕçтерессине мĕнле йĕркеленипе интересленсех тăрать.

Асăннă çÿревĕн тĕллевĕ вара Аслă Çĕнтерÿ 70 çул тултарнипе çыхăннă: Чăваш Ен Пуçлăхĕ Тăван çĕршывăн Аслă вăрçин ветеранĕсене - 1945 çулхи май уйăхĕнче пĕтĕм этемлĕхе Çĕнтерÿ парнеленĕ паттăр салтаксене тата тыл ĕçченĕсене, çавăн пекех вăрçă ветеранĕсен социаллă пурнăçри тата экономикăри ыйтăвĕсене уçăмлатмашкăн тата çамрăк ăрăва патриот воспитанийĕ памашкăн пуçаруллă хутшăнакан организацисен ертÿçисене чыслама Михаил Игнатьев ятарласа килнĕ. Савăнăçлă мероприятие Чăваш Республикин Министрсен Кабинечĕн Председателĕн заместителĕ - сывлăх сыхлавĕпе социаллă аталану министрĕ Алла Самойлова, Шупашкар хулин пуçлăхĕ Леонид Черкесов, асăннă социаллă учрежденин директорĕ Ренада Федорова хутшăнчĕç.

Республика Пуçлăхĕ хисеплĕ ватăсене Аслă Çĕнтерÿ ячĕпе ăшшăн саламларĕ, ветерансемпе тĕл пулмашкăн яланах хатĕррине пĕлтерчĕ. «Тăван çĕршывăн 1941-1945 çулсенчи вăрçинче пирĕн халăх ирсĕр тăшмана çапса аркатнин чăнлăхне çамрăксен ăша хывмалла. Эсир вĕсемпе курнăçнă самантсенче çакна яланах асра тытатăр, çĕнĕ ăрăва çĕршыва юратма, унпа мăнаçланма вĕрентетĕр. Чăн та, юлашки 15-20 çулта воспитани ĕçĕнче кăлтăксем те пулчĕç ахăр. Халĕ вара çамрăксен чунне пуянлатассишĕн пĕрлехи вăйпа тăрăшмалла, - палăртрĕ вăл. - Çĕнтерÿ кунĕнче ял халăхĕ вăрçă паттăрĕсене чысламашкăн палăк умне пухăннă самантра эпир те, ача-пăча, мăнаçланаттăмăр, вĕсенчен тĕслĕх илме сăмах параттăмăр. Палăксемпе обелисксем - сăваплă вырăн. Кăçал асăну паллисенчен 1200-шне ытла тирпейлесе йĕркене кĕртрĕмĕр. Ыран Комсомольскинче çĕнĕ монумент уçатпăр...

Аслă Çĕнтерÿ кунĕпе тăван республика халăхне килĕшÿлĕхпе тăнăçлăх сунатăп. Сире, хисеплĕ ветерансем, - вăрăм кунçул».

Вăрçă паттăрĕсемпе тыл ĕçченĕсене - Шупашкар хулинче пурăнакан Павел Архипова, Мирра Буркинăна, Гурий Данилова, Мария Дементьевăна, Михаил Иванова, Анастасия Ивановăна, Анфиса Кавказовăна, Григорий Кузьмина, Ольга Макаровăна, Зоя Пугачевăна, Василий Чернова, Василий Якимова Чăваш Ен Пуçлăхĕ «Тăван çĕршывăн 1941-1945 çулсенчи Аслă вăрçинче çĕнтернĕренпе 70 çул çитнĕ ятпа» юбилей медалĕпе чысларĕ.

Хаклă çыннăмăрсем, уявра та, ахаль кунра та çак наградăпах çÿрĕр. Эсир ăна тивĕçлипе çĕнсе илнĕ...

Ветерансен пурнăçне çăмăллатма тата çамрăксене патриот воспитанийĕ пама пуçаруллă хутшăнакан организацисен ертÿçисем асăнмалăх медальсемпе дипломсене тивĕçрĕç.

Уява искусствăн 4-мĕш шкулĕн, «Хуркайăксем» агитбригадăн пултарулăх ушкăнĕсем хăйсен юрри-ташшипе илем кÿчĕç.

Михаил Игнатьев социаллă учреждени территорийĕнчи аллейăра сирень хунавĕсем лартрĕ.

Валентина СМИРНОВА