Женя та чи телейлисен йышĕнче

Шупашкарта пурăнакан Евгения Сергеевăн та паян ĕмĕчĕ пурнăçланчĕ. «Ĕмĕтсен елки» ыр кăмăллăх акцийĕпе килĕшӳллĕн ăна Общество Канашĕн председателĕ Наталия Партасова планшет парнелерĕ.

Сергеевсен туслă çемйинче тăватă ача çитĕнет: чи кĕçĕнни — Даниил, унтан Стас, Женя тата вунă çулти Оля. «Ĕмĕтсен елки» акци пирки илтсен кунта пурте хутшăнма шухăшланă. Кашнин тĕрлĕрен ĕмĕт пулнă: Оля - йĕлтĕрпе ярăнмалли ятарлă тумшăн, Стас - телефоншăн. Аппăшĕсемпе пиччĕшĕнчен пĕчĕк Даниил та юлман — вăл чукун çул ыйтнă. Женя хăйĕн çырăвĕнче планшет пирки ĕмĕтленнине пĕлтернĕ – акă пурнăçланчĕ те.

— Женя çак куна ĕнертенпех чăтăмсăррăн кĕтрĕ. Паян хамăн ĕмĕт пурнăçланнă пекех туйса илтĕм, хĕрĕмшĕн çав тери савăнтăм. Аппăшĕпе пĕрле пĕчĕк Даниила та конструктор парса хавхалантарчĕç, вăл та хĕпĕртерĕ, — савăннине пытармарĕ тăватă ача амăшĕ Елена Владимировна.

Хĕрачана сумлă хăнасем те саламларĕç, тăрăшса вĕренме, пысăк çитĕнӳсем тума сунчĕç.

www.hypar.ru Татьяна Ишмуратова сăн ÿкерчĕкĕсем