Спортсменсене тÿлекен премисене ÿстерĕç

Спортсменсемпе тренерсемшĕн кăмăллă хыпар пур. Вăл регион ертӳçин Çырăвне пурнăçлассипе çыхăннă. Паян Правительствăн пĕрремĕш вице-премьерĕ-финанс министрĕ Михаил Ноздряков ертсе пынипе иртнĕ ларăвĕнче Спорт министрĕ Василий Петров пĕтĕм тĕнчери ăмăртусенче пысăк кăтартусемпе палăрнă спортсменсене, вĕсен тренерĕсене тӳлекен премисене ӳстересси çинчен калакан йышăну хатĕрлени çинчен пĕлтерчĕ.

Сăмах май, çав премисене 2012 çултанпа пысăклатман. Чăваш Енре вĕсен виçи Атăлçи округĕнчи ытти субъектринчен пĕчĕкрех. Доллар хакланнине кура пăхас тăк — тӳлевсем вунă çулта икĕ хут йӳнелнĕ, çавăнпа вĕсене хăпартмаллах. Михаил Ноздряков, чăн та, доллар хакланнипе çыхăннă аргументпа килĕшесшĕн пулмарĕ — «Раççейре пурăнатпăр, тӳлевсене долларпа виçни вырăнсăр», çапах спортсменсемпе тренерсене хавхалантарасси пĕлтерĕшлĕ пулнине хирĕçлемерĕ.

Спортăн Олимп вăййисен шутне кĕмен тĕсĕсемпе те тĕнче шайĕнчи ăмăртусенчи пысăк кăтартусемшĕн паракан тӳлевсем 10-50% пысăкланĕç. Пĕлтĕр, сăмахран, спорт аэробикипе, кире пуканĕ йăтас, спорт туризмĕ енĕпе спортсменсене çавнашкал тӳлевсемпе хавхалантарнă. Республикăн 2022 çулхи бюджетĕнче çак тӳлевсем валли 36,2 миллион тенкĕ пăхса хăварнă. Ку шута Раççейĕн пĕрлештернĕ командин йышĕнчи ентешсене паракан стипенди те кĕрет.

Стипендипе çыхăннă уйрăм йышăну та пулчĕ. Правительство ЧР Пуçлăхĕн спортсменсене паракан стипендие тӳлемелли йĕркене çĕнетрĕ. Тӳрлетӳсен шутĕнче — стипенди тӳлеме пăрахмалли сăлтавсене уçăмлатни. Калăпăр, спортсмен хăйĕн кăтартăвĕсене малтан урăх регионшăн шута илмелли килĕшӳ тăвать е урăх регион чысне хӳтĕлесе ăмăртăва хутшăнать тĕк — унăн республика стипендийĕпе сывпуллашма тивĕ. Палăртса хăварни вырăнлă: 2021 çулта ЧР Пуçлăхĕн стипендине спортăн 32 тĕсĕпе 212 спортсмен илнĕ — пĕтĕмпе 35 миллиона яхăн тенкĕ.

Ларура спорт теми çакăнпа кăна та вĕçленмерĕ-ха: патшалăхăн «Физкультурăпа спорта аталантарасси» программине улшăнусем кĕртрĕç. Сăмах спорт объекчĕсем пирки пырать. Пĕлтĕр республика бюджетĕнчен роллерлă йĕлтĕр, маунтинбайк трассисен, Атăл леш енчи «Росинка» базăн физкультурăпа сывлăх комплексĕн строительствин, темиçе объект реконструкцийĕн проектпа смета докуменентацийĕ валли укçа уйăрнă. Министрсен Кабинечĕ çак объектсен строительствине патшалăхăн 2025 çулчченхи программинче пăхса хăварассине çирĕплетрĕ. Кирлĕ укçана республика тата федераци бюджечĕсенчен уйăрмалла.

www.hypar.ru