Шăмăршă, Патăрьел районĕсене - ĕçлĕ визитпа

Паян Чăваш Республикин Пуçлăхĕ Олег Николаев асăннă районсене çитсе килчĕ.

Олег Алексеевич малтан "Победа" хуçалăх ĕçĕ-хĕлĕпе паллашрĕ. Хуçалăх ертÿçи Владимир Абсалямов пĕлтернĕ тăрăх, унта, тĕпрен илсен, пĕрчĕллĕ культурăсем туса илеççĕ. Кăçал хĕвел çаврăнăш, соя, рапс туса илекен лаптăксене пысăклатнă. Сăмахран, хĕвел çаврăнăша 240 гектар çинче çитĕнтернĕ. Пуçтарса илнĕ хыççăн ăна Хусана ăсатаççĕ. Виçпÿрт Шăмăршăсем кăçал ку енĕпе 8 миллион таса тупăш илме тĕв лартнă.

Олег Николаев малалла район центрне çул тытрĕ. Унта Наци паркĕн ĕçĕпе унăн директорĕ Юрий Татарских паллаштарчĕ. Олег Алексеевич çакăнтах района пушар машини парнелерĕ.

Кăçал Шăмăршăри пĕтĕмĕшле пĕлÿ паракан вăтам шкула тĕпрен юсама пуçланă. Унта та çитсе курчĕ республика ертÿçи. Строительсем çине тăрса тăрăшаççĕ, юсава вăхăтра вĕçлесшĕн.

Патăрьел районĕнчи Шăнкăртамри 1-мĕш вăтам шкулта та паян строительсем ĕçлеççĕ. Унти ĕç калăпăшĕ тата пысăкрах, çавăнпа юсава чÿк уйăхĕн пуçламăшĕнче кăна пĕтерме май килĕ. Шăнкăртам ачисем унччен салари тепĕр шкулта 2- мĕш сменăпа вĕренĕç.

Олег Николаев çавăн пекех районти Пикшик ял тăрăхĕнче туса лартнă çĕнĕ предприятие - сысна пусса тирпейлекенскере - уçма хутшăнчĕ.

www.hypar.ru Надежда СМИРНОВА сăн ÿкерчĕкĕсем