Парăмçăсен укçипе икçĕре яхăн çурта юсаса çĕнетме пулать

Çакна Республикăри тĕп юсав фончĕн пуçлăхĕ Светлана Баранова Чăваш Енри региона ертсе пыракан центр социаллă сетьсемпе усă куракансемпе йĕркеленĕ тÿрĕ эфирта каланă.

Вăл палăртнă тăрăх, хваттер харпăрçин е управляющи компанин çурт кивелнине çирĕплетекен документсене Строительство министерствин комиссине леçмелле. Ыйтăва пăхса тухнă чухне çуртра пурăнакансенчен сахалтан та 95 проценчĕ тÿлев хывнине тата тĕп юсав фондĕнче укçа пухăннине шута илеççĕ.

Светлана Баранова ЧР строительство министрĕн çумĕпе Илья Ионочкинпа пĕрле ытти ыйтăва та уçăмлатнă. Мобилизациленисене тата вĕсен çемйисене тÿлеве вăхăтра хывмасан пенирен хăтарнине палăртнă. Лифтсене çĕнетес тавра та калаçу пуçарнă. Çитес çул ку тĕллевпе республика бюджетĕнчен тĕп юсав фондне 100 миллион тенкĕ парĕç. Республикăри тĕп юсав фончĕпе 8 800 505 97 71 телефонпа çыхăнма пулать.

Чăваш Республикинчи региона ертсе пыракан центр çулталăк пуçланнăранпа социаллă сетьсем урлă çурт çĕклессипе тата управляющи компани ĕçĕпе çыхăннă 273 ыйтăва шута илнĕ. Тĕп юсав валли укçа хывас тĕлĕшпе 57 ыйту йышăннă.

www.hypar.ru