Мускаври ача-пăча форумне хутшăнĕç

Паян ЧР Культура министрĕн çумĕ Георгий Богуславский ача-пăча культура форумне хутшăнакан пултаруллă та маттур ачасемпе тĕл пулчĕ.

— Эсир пирĕн республикăна чăннипех те тивĕçлĕ кăтартма пултаракан çамрăксен, шкул ачисен тĕсĕ. Эпĕ сирĕнпе мухтанатăп. Таврăнсан ытти çĕршывсен, регионсен опычĕпе тăван тăрăхра паллаштарасса, çав шутра культура министерствине ача-пăча вĕренĕвĕ енĕпе пулăшасса, çак форум пирки юлташăрсене, пĕрле вĕренекенсене каласа парасса шансах тăратăп, — терĕ вăл ачасене, çавăн пекех вĕсен ашшĕ-амăшне тав тунă май.

Чăваш Республикинчен çак форума çичĕ ача хутшăнĕ. Вĕсем — Нгуен Хай Йен Тхи, Назар Фадеев, Елизавета Трубина, Арина Елистратова, Елизавета Мурзакаева, Виктория Енилина, Мария Люлина.

Асăннă форум Мускав хулинче, çурла уйăхĕн 25-27-мĕшĕсенче иртĕ. Унта РФ мĕн пур субĕектĕнчен 1,5 ытла ача пухăнĕ. Çавăн пекех Беларуç, Кăнтăр Осети, Серби, Таджикистан, Туркменистан, Узбекистан республикисенчен, Бахрейн Королевствинчен, Донецк, Луганск халăх республикисенчен, Египетран, Абхазинчен килме палăртнă. Хăнасене тулли программа кĕтет. Вĕсем культура деятелĕсемпе тĕлпулусене, ăсталăх класĕсене, экскурсисене, арт-шкулсене, çавăн пекех лекцисене хутшăнĕç.

Пултаруллăскерсем Чăваш Республикин чысне «Музыкальное искусство», «Хореографическое искусство», «Театральное искусство», «Кино и анимация», «Изобразительное искусство», «Традиционные и новые медиа», «Музейная деятельность» номинацисенче кăтартрĕç. Вĕсене ăнăçу сунатпăр!

Татьяна ИШМУРАТОВА. Автор сӑн ӳкерчĕкӗсем