Инвестици, ĕç вырăнĕсем шантараççĕ

Юнкунхи ларура Министрсен Кабинечĕ «Ветеринари çинчен» саккуна кĕртмелли улшăнусене ырларĕ. Вĕсем федерацин тивĕçлĕ саккунне тӳрлетнипе сăлтавланнă. Патшалăх ветеринари службин ертӳçи Александр Шакин тĕп çĕнĕлĕх çинчен каларĕ: вăл йышăнакан должноçа кам йышăнассине кăçалхи авăн уйăхĕн 1-мĕшĕнчен тытăнса ЧР Пуçлăхĕ татса парĕ — ертӳçе вăл Раççей Ял хуçалăх министерствипе канашласа уйăрса лартĕ.

Экономика аталанăвĕн министрĕн тивĕçĕсене пурнăçлакан Надежда Столярова Çĕнĕ Шупашкарти уйрăм экономика зонин эксперт канашĕ çинчен калакан положение çирĕплетес ыйтупа сăмах илчĕ. УЭЗ 542 гектар йышăнать. Резидентсем валли налук тĕлĕшпе çăмăллăхсем палăртнă. Уйрăм экономика зонин ĕçне йĕркелесе пыма управляющи компани туса хунă — «Фильтр-21» ОООн пысăк шанăçа тӳрре кăлармалла. Положени проектĕнче палăртнă тăрăх, пулас резидентсен бизнес-планĕсене малтан шăпах эксперт канашĕ хаклать, вăл симĕс çутă панă хыççăн тин предприяти УЭЗ резиденчĕн статусне илет.

Сăмах май, хальхи вăхăтра ЧР Инвестици аталанăвĕн агентстви асăннă зона резиденчĕн статусне илес кăмăллисенчен 5 заявка йышăннă. Вĕсем — «Оргсинтез», «Звенигово», «Партвуд», «Биопланета», «Стар—Нафта» компанисем — 13 миллиарда яхăн тенкĕлĕх инвестици хывма, 1 пинрен кая мар çĕнĕ ĕç вырăнĕ йĕркелеме шантараççĕ.

www.hypar.ru