Çумăр çукки сыхă пулма хистет

Тунтикун ĕç тăвакан влаç органĕсен тата муниципалитетсен ертӳçисемпе ирттернĕ канашлура вĕрентӳ министрĕ «Профессионалитет» программăпа бюджет вырăнĕсене 3,4 пине яхăн çамрăка вĕренме йышăнни çинчен пĕлтерчĕ. Шăпах — тĕрлĕ сферăра кирлĕ специальноçсемпе. Çак тĕллевпе модăри хăш-пĕр специальноçа коммерци никĕсĕ çине куçарма тивнĕ, тĕрлĕ отрасль ыйтаканнисене симĕс çутă панă. Михаил Ноздряков çак ыйтупа малалла ĕçлемеллине палăртрĕ — ĕç рынокĕнче мĕнле специалистсем ытларах кирлине тимлĕ сăнаса тăма сĕнчĕ. Дмитрий Захаров ку енĕпе предприятисемпе тачă çыхăну тытни пĕлтерĕшлине çирĕплетрĕ. Калăпăр, халĕ производствăра программа управленийĕллĕ станоксемпе ĕçлекен рабочисем çителĕксĕрри палăрать те — вĕсене вĕрентес тĕлĕшпе тимлĕхе ӳстернĕ.

Канашлу пушарсен темине сӳтсе явнипе вĕçленчĕ. Ытти çул ку вăхăтра çакнашкал ыйту кун йĕркинче пулакан марччĕ. Анчах кăçал типĕ çнталăк авăн уйăхĕн вĕçĕнче те вут-çулăмран сыхаланасси пирки калаçма хистет. Çут çанталăк министрĕ Эмир Бедертдинов пĕлтернĕ тăрăх, кану кунĕсенче кăна вăрмансенче виçĕ пушар пулнă. Иккĕшĕ — Йĕпреç, тепри — Шупашкар округĕсенче. Çулталăк пуçланнăранпа вара вăрмансенче вут-çулăм 14 хут алхаснă. Чылай тĕслĕхшĕн чукун çул айăплă-мĕн — типĕ курăк, çулçă тепловозсем сирпĕтекен хĕлхемрен самантрах хыпса илеççĕ. Чукун çул ертӳлĕхне асăрхаттарсах тăраççĕ пулин те — усси сисĕнсех каймасть иккен.

Вăрмансенче кăна мар, ытти çĕрте те тимлĕ пулмалла. ГКЧС ертӳçи Сергей Павлов çулталăк пуçланнăранпа 1172 пушара шута илни çинчен пĕлтерчĕ — пĕлтĕрхи çак тăпхăртинчен нумайрах. Пăшăрхантаракан çак статистикăра, паллах, типĕ çанталăк тӳпи те пур. Çавăнпа ГКЧС ертӳçи профилактика тĕлĕшпе çине тăрса ĕçленине çирĕплетрĕ. Михаил Ноздряков та асăрхаттарчĕ: «Виçĕ уйăх çумăр çуман та — сыхлăха çухатма юрамасть».

www.hypar.ru