Чăваш Енри профсоюзсем — 100 çулта

Паян «Чăваш Республикинчи профсоюз организацийĕсен пĕрлĕхĕ» союз канашĕн ларăвĕ иртрĕ. Мероприятие Чăваш Енре профсоюзсене йĕркеленĕренпе 100 çул çитнине халалланă.

Савăнăçлă уява Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев хутшăнчĕ. «Ĕç çыннин саккунлă прависемпе интересĕсене хӳтĕлес тĕлĕшпе профсоюзсен пĕлтерĕшĕ питĕ пысăк. Вĕсем ĕç условийĕсене лайăхлатассишĕн, ĕçлекенсен пурнăçне çăмăллатассишĕн тăрăшаççĕ. Сăмах май, республика ертӳлĕхĕ те профсоюзсемпе пĕр шухăшлă пулса ĕç тухăçлăхне ӳстерессине, çынсен пултарулăхне туллин уçса пама пулăшакан, паянхи самана ыйтнипе килĕшсе тăракан пурнăç условийĕсене туса хурассине пысăка хурать», — терĕ Олег Алексеевич профсоюз хастарĕсене юбилейпе саламласа.

Уявра çавăн пекех Чăваш Республикин Патшалăх Канашĕн Председателĕ Альбина Егорова, Чăваш Республикин Ĕçлев тата социаллă хӳтлĕх министрĕ Алена Елизарова, ытти сумлă хăна ырă сунса сăмах каларĕç.

www.hypar.ru Валентина БАГАДЕРОВА сăн ӳкерчĕкĕсем.