Чăваш Ен ачисем олимпиецсене хавхалантараççĕ

22 Чÿк, 2021

Уяв хăнисем ЧЭСике питĕ килĕштерчĕç.

Чăваш Енри ачасем тата Чăваш энергосбыт компанийĕ /Трансэнергопром компанисен ушкăнĕ/ пуçарнипе иртнĕ шăматкун Шупашкарта Пĕтĕм тĕнчери ача кунне халалланă спорт ыр кăмăллăх уявĕ пулчĕ. Праçнике республикăри шкулсен хоккей командисем, ЧЭСК ĕçченĕсен ачисем тата çамрăк фигуристкăсем хутшăнчĕç.

Пекинри Хĕллехи олимпиада умĕн «Шупашкар — Арена» пăр керменте Чăваш энергосбыт компанийĕн энергетикĕсем тата Шупашкар хулин администрацийĕн, ЧР Патшалăх Канашĕн командисем клюшка алла илсе тупăшрĕç — çапла майпа Раççейĕн пĕрлештернĕ командине хавхалантарас терĕç. Паллах, çитĕнекен ăрăва ĕçлеме, çĕнтерме, тĕллеве пурнăçлассишĕн çине тăма вĕрентсе воспитани пани те пысăк пĕлтерĕшлĕ.

Маларах энергетиксем Шупашкарти тата Пăрачкаври ашшĕ-амăшĕн ăшшисĕр юлнă ачасен центрĕсенчи тăлăх ачасене конькисем парнеленĕ. Çĕмĕрлери центрти ачасем вара хĕле кĕнĕ çĕре йĕлтĕрсем кирли çинчен каланă — вĕсене те шăпах Пĕтĕм тĕнчери ача кунĕ тĕлне парнеленĕ. Шăпăрлансен савăнăçĕ, паллах, виçесĕр. Вĕсем энергетиксене спортпа туслă пулма, Хĕллехи олимпиадăна хутшăнакансен списокне кĕнĕ Татьяна Акимова биатлонистка пек маттур пулма, çитĕнӳ тумашкăн ăнтăлма шантарчĕç.

— Паянхи кун харăсах темиçе сăлтава пĕтĕçтернипе асра юлĕ: Пĕтĕм тĕнчери ача кунĕ, пирĕн хоккей командисем Чăваш Енре пăр çинче пирвайхи хут тĕл пулни тата çĕршывăн пĕрлештернĕ командине Пекинри Хĕллехи олимпиадăра ăнăçлă тупăшмашкăн хавхалантарма йĕркеленĕ акци. Ачасем — пирĕн пуласлăх. Çак спорт уявне ачасем хăйсем пуçарчĕç, çавăнпа эпир ăна Пĕтĕм тĕнчери ача кунĕнче йĕркелерĕмĕр. Спорт çынна дисциплинăллă пулма, чăрмавсене сирмешкĕн хăнăхма вĕрентет. Шăпах çак пахалăхсем ачасене пурнăçра ăнăçу тума пулăшаççĕ, — терĕ пухăннисене саламласа Трансэнергопром гендиректорĕ Елена Климашевская.

Сăмах май, хоккей командин символне — ЧЭСик çӳлевĕçе — ӳкерчĕксен конкурсĕн кăтартăвĕсем тăрăх суйласа илнĕ, унта 13 çулти Дарья ĕçĕ çĕнтернĕ. Ăна 3 пин тенкĕлĕх сертификат парнелесе хавхалантарчĕç.

Чăваш Енĕн промышленноç тата энергетика министрĕн тивĕçĕсене пурнăçлакан Александр Кондратьев регионти пысăк предприятисем пурте социаллă акцисем йĕркеленине палăртрĕ. Чăваш энергосбыт компанийĕ — вĕсенчен пĕри, вăл республикăри ачасен центрĕсене шефа илнĕ, вĕсене пулăшать. «Хоккей, юлташла çак тĕлпулу ачасене хавхалантарса çĕнĕ çитĕнӳсем патне ăнтăлма пулăшасси пирки иккĕленместĕп», — терĕ Александр Андреевич.

Ача прависем енĕпе ĕçлекен уполномоченнăй Алевтина Федорова ачасене Чăваш Енри Хĕрарăмсен союзĕн председателĕн Наталья Николаевăн ячĕпе саламларĕ, Чăваш энергосбыт компанийĕ социаллă тĕллевлĕ компани пулса хăйĕн çине яваплăх илнине, республикăри ачасен центрĕсене пулăшнине пысăка хурса хакларĕ: «Компани кашни праçникрех ачасене асра тытнине палăртма кăмăллă. Мĕнешкел илемлĕ уяв, сывлăхпа спорт кунне, йĕркеленĕ! Ырă çак йăла малалла тăсăлтăр, эпир вара, Хĕрарăмсен союзĕ, пĕрле ĕçлеме, ачасене асамлăх парнелеме хутшăнмашкăн яланах хатĕр».

Экономика аталанăвĕн министрĕн заместителĕ Денис Спирин, Шупашкар хулин администрацийĕн пуçлăхĕн тивĕçĕсене пурнăçлакан Андрей Петров, тĕп хула пуçлăхĕн заместителĕ Наталья Евсюкова та ачасене çĕнтерме, çĕкленӳллĕ кăмăл-туйăм сунчĕç.

Юлашкинчен вара энергетиксем кашни ачана парнесем пачĕç: çамрăк хоккеистсене — 10 пин тенкĕлĕх сертификатсем, фигуристкăсене — асăнмалăх панесем. Тĕрлĕ мастер-класс иртрĕ, интерактивлă зонăсем ĕçлерĕç, ЧЭСик çӳлевĕç çурипе пĕрле сăн ӳкерĕнмелли фотосесси пулчĕ.

Праçнике килнĕ мĕн пур ача тĕп хулари чи лайăх каток çинче конькипе массăллăн ярăнса савăнчĕ. Вĕсемпе пĕрле, паллах, энергетиксен çĕнĕ символĕ те — хастар та ырă кăмăллă ЧЭСик. Конькипе, йĕлтĕрпе ярăнмалла-и, ыр кăмăллăх тата экологи акцийĕсем иртеççĕ-и — вăл малашне те яланах ачасемпе юнашар пулĕ.