Чӑваш ачисем республика Пуҫлӑхӗпе Олег Николаевпа тӗл пулчӗҫ

"Хыпар" Издательство çуртĕнче ЧР Пуçлăхĕн Олег Николаевăн «Тантăш» хаçат корреспонденчĕсемпе йĕркеленĕ пресс-конферецийĕ иртрĕ. Мероприятие Чăваш чĕлхи кунне халалланă. Халиччен республикӑра кун пекки пулманччӗ.

Ачасем кăсăклă та хăйне евĕрлĕ ыйтусем хатĕрлесе килнĕ. Юнкорсем — кĕçĕн классенчен пуçласа аслă классем таранах. Чи кӗҫӗнни - 7 ҫулта. Ҫамрӑк корреспондентсен хушшинче чӑвашла тумланса килнисене те курма ҫав тери кӑмӑллӑ пулчӗ.

Пӗтӗмпе 20 яхӑн ыйту янӑрарӗ. Олег Николаева вĕсене хуравланă май ачалăха таврăнма кăмăллă пулни сăнĕнченех палăрчĕ. Калаçу пынă вăхăтра вăл Иван Яковлевăн «Кулач» калавне те аса илчĕ.

Сӑмах май, республика ертӳҫи чӑвашлӑха упрас, аталантарас ыйтӑва пысӑк тимлӗх уйӑрать. Ҫавна май час-часах тӗрлӗрен мероприяти пуҫарать. Акӑ "Хыпар" Издательство ҫурчӗ ирттерекен #ЧӑвашлаВаттисенСӑмахӗ флешмоба та хаваспах хутшӑнчӗ. Ачасен хушшинче вӑл чӑвашлӑхпа ҫыхӑннӑ мероприятисене мӗнле шухӑшласа тупнипе кӑсӑкланакансем пулчӗҫ. Ку тӗлӗшрен пӗр шухӑшлӑ ҫынсем пуҫтарӑнни аван пулнине палӑртрӗ республика Пуҫлӑхӗ.

«Олег Алексеевич, сире ача чухне айăпа кĕрсен час-часах кĕтесе тăрататчĕç-и? Тата сире пăтă çиме нумай хистетчĕç-и?» — ыйтрĕ çамрăк корреспондентсенчен пĕри. «Мана кĕтесе тăратса вăхăта сая яман, — терĕ республика ертӳçи. — Айăпа кĕрсен анкартинче ытларах ĕçлеттеретчĕç. Унтан кĕрсен пăтта та юратсах çиетĕн».

Тепĕр юнкор вара ыйтăвне çапларах пуçларĕ: «Эсĕ хуть те кама вĕренсе тухсан та арçыннăн пур ĕçе те пĕлмелле», — теççĕ мана килте. Сирĕн килте ĕçлеме вăхăт юлать-и?» Олег Алексеевич ăна аслисен шухăшне итлеме сĕнчĕ, арçыннăн чăнах та темĕн тума та пĕлмеллине каларĕ. Уйрăмах ку ялта пурăнакансене пырса тивнине те палăртрĕ, мĕншĕн тесен хулари хваттерте ытла темĕнех ĕçлеймĕн. Çавăнпа республика ертӳçи Шупашкар çывăхĕнчи ялта çурт çĕкленĕ.

Олег Николаевăн вĕрентекенĕсенчен пĕри — Анатолий Федорович Михеев. Вăл вĕренекенне мĕнлерех мухтани çинчен Хĕрлĕ Чутай районĕнчи Мăн Этмен шкулĕнчен килнĕ Женя Никифорова каларĕ. «Анатолий Федорович манăн пурнăç пирки пĕтĕмпех пĕлет», — терĕ Олег Николаев юратнă вĕрентекенĕ патне салам вĕçтернĕ май. Унăн тăван ялĕнчен Чурпайран килнĕ Марина Охтярова вара ентешĕсем Олег Алексеевич спортпа туслă пулнине пĕрмаях аса илнине каларĕ. Халĕ те çан-çурăма çирĕплетме май тупакан Олег Николаев çăмăл атлетикăна ытларах килĕштерни палăрчĕ.

Мероприятире хускатнӑ ыйтусем ҫивӗчлӗхпе те палӑрчӗҫ. Сӑмахран, Донбасран тарса килекенсене курсан мӗнле шухӑш ҫуралнипе те кӑсӑкланчӗҫ ачасем. "Паллах, вӗсемпе калаҫсан хӑрушӑ лару-тӑрӑва тата лайӑхрах ӑнланатӑн", - терӗ республика ертӳҫи.

Чӑн-чӑвашла иртнӗ пресс-конференцире ачасем республика ертӳçин килĕнче хăш чĕлхе янăранине те, унăн ачалăхĕнчи чи пысăк парне пирки те, тата ытти кăсăклă ыйту хуравне те пĕлчĕç.

www.hypar.ru Василий Кузьмин сăн ÿкерчĕкĕсем кунта...