Çар çыннисем прививка тутарчĕç

Паян Чăваш Республикин çар комиссариатĕнче ĕçлекенсем коронавирусран прививка тутарчĕç. Вĕсем патне Шупашкарти хулан 2-мĕш больницинчен ятарлă ушкăн килсе çитрĕ.

Укол тутарас текенсене Светлана Бронникова врач ӳт температурине, юн пусăмне, сатурацие тĕрĕслерĕ. Çар çыннисем хальлĕхе пĕрремĕш укол тутарчĕç. Çарпа тухтăр экспертизин центрĕн пуçлăхĕ Станислав Иванов чи малтан прививка тутаракансенчен пĕри пулчĕ. Çур çул маларах ăна коронавирус инфекцийĕ ернĕ. Станислав Андреевич чире ура çинчех, çăмăллăн ирттернĕ.

«Пирĕн кĕçех призыв пуçланать. Çар çыннисен прививка тутармаллах тесе шухăшлатăп. Пирĕн ĕçтешсенчен 80 проценчĕ икĕ уколне те тутарнă ĕнтĕ», - пĕлтерчĕ Станислав Иванов.

Паян пĕтĕмпе 15 çын коронавирусран прививка тутарчĕ.

www.hypar.ru Василий Кузьминăн сăн ӳкерчĕкĕсем кунта...