«Çăхавсене кĕске вăхăтра тишкермелле»

«Муниципалитетсенче должноçри çынсем çителĕклĕ тимлĕх уйăрман тĕслĕхсем пур», — терĕ мобилизацие йĕркелени пирки ĕç тăвакан влаç органĕсен тата муниципалитетсен ертÿçисемпе тунтикун ирттернĕ канашлура республика Пуçлăхĕ Олег Николаев. Çавăнпа вăл граждансенчен килекен ыйтусене тĕрĕслесе тăрассине хăйĕн çине илнĕ: «Мĕн пур пăтăрмахпа çăхава шута илмелле, кĕске вăхăтра тишкермелле. Хăш-пĕр ĕç-пуçа тымарта чухнех тĕп тумалла».

Калаçăва тăснă май Олег Николаев иртнĕ эрнере Раççей Правительстви палăртнă «ПроШкола» компанипе виçĕ шкул строительстви тĕлĕшпе концесси килĕшĕвĕсене алă пуснине аса илтерчĕ. Сăмах Кÿкеçре, Çĕнĕ Шупашкарта тата тĕп хулари «Хĕвеллĕ» микрорайонта çĕнĕ шкулсем тăвасси пирки пырать. Олег Алексеевич çак килĕшÿсем пысăк ĕçĕн кăтартăвĕ пулнине палăртрĕ — нумай ыйтăва сирме тивнĕ. Халĕ вара тата пысăкрах ĕç пуçланать: строительство пуçарассипе, ĕçсене йĕркелессипе çыхăннă ыйтусене татса памалла. Çав шутра — çĕр лаптăкĕсене строительство валли парасси, «Хĕвеллĕ» микрорайонти шкул проектне хатĕрлесси, строительство ĕçĕсене пуçăнасси.

— Ытти регионта 1 пин ача таран вĕренмелли шкулсене çулталăкра хута янă тĕслĕхсем пур. Çав шутра — пирĕннинчен кăрарах климатлă тăрăхсенче те. Пирĕн вĕсенчен япăх мар ĕçлемелле. Çав вăхăтрах ĕçсен пахалăхĕ çинчен манма юрамасть, — асăрхаттарчĕ Олег Алексеевич.

www.hypar.ru