Кăлканлă çеçен хир ытамĕнче

Эрĕнпур хутлăхне - кăлканлă çеçен хир ытамне - шăпах вун пилĕк çул каялла çитсе килнĕччĕ. Ун чухне Абдулино районне кĕрекен Ялпай ялĕнче пĕрремĕш хут облаçре пурăнакан чăвашсен Акатуйĕ иртнĕччĕ. Ун чухне ăна хăйĕн ячĕпе мар, культура уявĕ тесе палăртнăччĕ.

Çак кунсенче татах пулма тÿр килчĕ Эрĕнпурта. Хальхинче К.В.Иванов ячĕллĕ Чăваш патшалăх академи драма театрĕн йышĕпе. Паллă коллектив федерацин Атăлçи округĕнчи театрсен пĕрремĕш фестивальне хутшăнчĕ. Ăна Эрĕнпур кĕпĕрнине туса хунăранпа - 270 тата Эрĕнпур облаçне йĕркеленĕренпе 80 çул çитнине халалланă.