«Извеç ура»

Тархасшăн, калăр-ха, "извеç ураллă" чăхсене мĕнле сиплемелле? Кĕçĕттерекен сăвăссене епле пĕтермелле?

Валентина ГОРШКОВА. Вăрнар районĕ.

Специалист сĕнĕвĕ: чăх-чĕпе, уйрăмах ÿссе çитĕннĕ чăхха тĕрлĕ йышши сăвăс тапăнать. Ытларах чухне вĕсем уран тĕксĕр вырăнĕсенче пулаççĕ, сайра-хутра тĕк çинче те. Сиенленнĕ вырăн кĕçĕтнĕрен чăх ăна тăтăшах сăхать, таккать. Çакна пула ÿт юнланса хытнă сийпе витĕнет, чĕрне çĕрме тытăнать. Чăх уксахлать, çăмарта тума пăрахать.

Кнемидокоптоз /ку чире çапла ят панă/ çуркунне тата çулла палăрать.

Чăхха акарицидсенчен пĕринпе /0,01 процентлă эктомин, 0,2 процентлă алуган, 0,4 процентлă трихлорметафос е 4 процентлă К супăнь/ усă курса сиплеççĕ. Унсăр пуçне 0,0025 процентлĕ бутокс та юрăхлă. Урине, кĕлеткипе пуçне тытса кайăк-кĕшĕке майĕпен 1-2 минутлăха хатĕр шĕвеке яраççĕ. 7 кунран çак ĕçе тепĕр хут пурнăçлаççĕ. Ун хыççăн таса хуралтăна вырнаçтараççĕ, хальччен усранă витене акарицидсемпе пĕрĕхтереççĕ.

Кнемидокоптоз чирĕнчен хÿтĕлес тесен 6 уйăхран аслăрах чăх ÿтне тăтăш тĕрĕслемелле. Йышăн 10 ытла проценчĕ чирлине палăртсан ăна йăлт улăштарса çĕнетмелле.

Уйрăм çын опычĕ: "Извеç урана" сиплемелли чи ансат мелпе паллаштарасшăн. Кăмăл пулсан ăна кашниех алла илме пултарать.

Чирлĕ чăх урине кăшт ăшăтнă тип çупа сĕрмелле. Ку ĕçе каç енне пурнăçламалла. 1-1,5 эрнерен юнланса хытнă сийсем хăйпăнса ÿкеççĕ.

Тепĕр меле те тĕрĕслесе пăхнă. 100-150 грамм тип çăва пĕр апат кашăкĕ солидол хушмалла, лайăх пăтратмалла, ăшăтмалла. Чирлĕ чăх урине ?черетпе% ăшă шĕвекре темиçе кун тытмалла. Çакă пĕрремĕш мелрен те лайăхрах.

Специалист шухăшĕ: Вулакан сĕнĕвĕ усăллă темелле. Чир сăвăсран пуçланнине шута илсен чăх урисене ăшăтнă çу ăшĕнче 1-2 эрне тытни сурана хăйпăнма пулăшать, сăвăс та сывлайми пулса вилет.

Анчах çак кăпшанкă уçă ÿт çинче кăна мар, тĕкре те тĕл пулать, çавăнпа чирлĕ чăхха комплекслă сиплемелле.