Чĕре хушнипе

Етĕрне округĕнчи Пĕрçырланти культура çурчĕ çумĕнче «Зов сердца» ушкăн йĕркеленнĕ. Волонтер юхăмĕн ертÿçи — Анна Кольцова.

«Эпир тĕрлĕ ĕç пурнăçлатпăр, — терĕ Анна Алексеевна. — Маскировка сетки çыхатпăр, аманнă салтаксене çапăçу хирĕнчен илсе тухмалли наçилккасем, госпитальте сипленекенсем валли аялти кĕпе-йĕм, кутамкка çĕлетпĕр, пахча çимĕç типĕтетпĕр… Кутамккана кирлĕ япаласем тултарса çар çыннисен çемйисен комитечĕ пулăшнипе Курск, Белгород, Донецк, Луганск, Запорожье тăрăхĕсенчи госпитальсене ăсататпăр. Унтан сипленсе тухакан салтаксене тăхăнма япаласем кирлĕ-çке. Килтĕш территори пайĕпе пĕрле килĕштерсе ĕçлетпĕр. Сăмахран, эпир дронран хÿтĕлекен утиялсене пуçтаратпăр та Килтĕшсене çĕлеме кайса паратпăр». Черчен те хÿхĕм хĕрарăмăн çакăн пек ушкăн йĕркелес шухăш мĕнле çуралнă-ши? Мăн Йĕкĕт ялĕнче çуралса ÿснĕскер маларах Етĕрнери 2-мĕш вăтам шкулта, унтан асăннă хулари агротехникумра вĕреннĕ. Каярахпа Мускавра пĕр организацире менеджерта тăрăшнă. «Волонтерсен юхăмне Мускавра пурăннă чухнех явăçрăм, — малалла сÿтĕлчĕ калаçу çăмхи. — Ун чухне коронавирус чирĕ сарăлнăччĕ. Кайран СВОна хутшăнакан салтаксен çемйисене пулăшу кÿме пуçларăмăр. Ун чухне мобилизаци те пуçланманччĕ-ха. Ятарлă çар операцине ытларахăшĕ контракт мелĕпе каятчĕ. Мăшăр та «Барс 6» подразделенипе контракт çырса СВОна кайрĕ. Манăн ачасемпе Чăваш Ене таврăнма тиврĕ. Контракт вĕçленнĕ хыççăн упăшка мобилизаци йышне лекрĕ. Вăл — офицер, званийĕпе халĕ — майор». Анна Кольцова салтаксене мĕн кирли çинчен малтанах упăшкинчен ыйтса пĕлнĕ. Етĕрнерен мобилизациленнĕ салтаксене тĕрлĕ хатĕрпе тивĕçтерес тĕллевпе вăл малтанхи вăхăтра Ульяновска та кайса çÿренĕ. Çар çыннисене пулăшма Пĕрçырланти культура çуртне халĕ 25-27 çын пухăнать-мĕн. Ытларах — салтак амăшĕсем, тăванĕсем, юлташĕпĕлĕшĕ. «Вĕсем пире питĕ пулăшаççĕ, — терĕ ертÿçĕ. — Ыр кăмăллăх пулăшăвне ăсатма ытларах чухне водительпе пĕрле хам çула тухатăп. Çак тĕллевпех Украинăна 37 хут кайса килтĕм. Эпир пĕр çĕре çеç мар, ятарлă çар операцийĕ пыракан пĕтĕм территорие çитетпĕр. Пулăшу ыйтакан мĕн пур подразделенипе ĕçлетпĕр. Урăхла каласан, никама та хирĕçлеместпĕр. Тепĕр чухне саккас паракан чылай пулать. Ун чухне черет йĕркелетпĕр, çапах та пурне те пулăшма тăрăшатпăр. Отпускран каякан салтаксем те тепĕр чухне пулăшу ыйтса пирĕн пата килеççĕ. Вĕсене те тĕрлĕ хатĕрпе, япалапа тивĕçтеретпĕр». Çав вăхăтрах Анна Кольцова виçĕ ача амăшĕ те. Асли 22 çулта пулсан, кĕçĕнни 5-мĕш класра çеç вĕренет. Вăл Етĕрнери 3-мĕш шкулта, кадет класĕнче, пĕлÿ илет. Ачисем ашшĕне питĕ-питĕ кĕтнине, уншăн тунсăхланине, çав вăхăтрах пăшăрханнине пĕлтерчĕ хĕрарăм. Хăй вара СВОна 37 хут кайса та юратнă çыннине ултă хутчен çеç тĕл пулнине каларĕ.

www.hypar.ru