Илемлĕ тĕпел – хĕрарăм сăн-пичĕ

Çаплах. Халăхра тĕпел тирпейлĕхне, илемлĕхне кура хĕрарăм ĕç-хĕлне те хаклаççĕ. Мĕнлерех илемлетме пулать-ха çак кĕтесе.

• Чи ансат мел – чÿрече каррисене çĕнетни. Хĕрлĕ, сарăрах хĕрлĕ тĕслĕ карăсем пÿлĕме ăмăр çанталăкра та çурхи сăн кĕртеççĕ. Улма-çырлаллă е тĕрлĕ чечеклĕ эрешпе ÿкернĕ пусмаран хатĕрленĕ штора та тĕпеле самай хăтлă тăвать.
• Тепĕр ансат вариант – илемлĕ темиçе ал шăлли, савăта тыткаламалли алса, пĕчĕк минтерсем, пукансем. Шăпах вĕсем куçа савăнтаракан пĕчĕк «тĕнче» пулса тăраççĕ.
• Стена çинчи обой йă­лăх­тарчĕ-и. Тÿрех юсав ĕçĕсене пуçăнма кирлĕ мар. Темиçе винил çыпăçтармăшĕ /наклейка/ интерьера илем кÿрĕç çеç мар, çĕтĕлнĕ-вараланнă вырăнсене тирпейлĕн «саплама» та пулăшĕç.
• Тĕпеле хăтлă тумалли тепĕр мел вăл – пĕтĕмĕшле çутăпа мар, уйрăм вырăна, кĕтесе çутатмалла туни. Хитре абажурлă бра е илемлĕ сĕтел лампи тĕпеле хитрелетеççĕ Уйрăм апатлану вăхăтĕнче ятарлă çутăсемпе усă курма юрать.
• Куçа килĕшекен тĕрлĕ вак-тĕвек те тĕпеле самаях илемлетме пулăшать. Калăпăр, интереслĕ чÿлмекри капăр чечек, эрешлĕ савăта тултарнă улма-çырла, тĕрлĕ тĕслĕ савăт-сапа - çаксем çемье бюджетне витĕм кÿмесĕрех тĕпеле хăтлă тума пулăшĕç, кăмăла çĕклĕç.