Халăх валли - таса шыв

Январĕн 26-мĕшĕнче ЧР Министрсен Кабинечĕн Председателĕ Иван Моторин республикăра федерацин тĕллевлĕ "Таса шыв" программине пурнăçлас ыйтупа канашлу ирттернĕ.

Вице-премьер - Строймин ертÿçи Олег Марков хăйĕн докладĕнче асăннă программăна Чăваш Енре 2011 çулта пурнăçлама тытăннине палăртнă. Программăпа килĕшÿллĕн пĕтĕмĕшле хакĕ 1,4 млрд яхăн тенкĕлĕх 5 объект строительствине пурнăçланă. Çав шутра 945,6 млн тенки - федераци бюджечĕн, 448,5 млн ытла тенки - республика бюджечĕн укçи. Кăçалхи январĕн 1-мĕшĕ тĕлне федераци бюджетĕнчен куçарнă укçапа туллин усă курнă.

Паянхи кун тĕлне Вăрнар поселокĕнче водовод строительствин 1-мĕш комплексне вĕçленĕ, Патăрьел, Шăмăршă районĕсене тата Комсомольски районĕн кăнтăр пайне шывпа тивĕçтерекен водоводăн шыв тасатакан сооруженийĕсене туса пĕтернĕ, Шăхасан ялĕнчи тата Çĕрпÿ хулинчи тасатакан сооруженисене реконструкциленĕ. 2015 çулăн пĕрремĕш çурринче Йĕпреç поселокĕнче тасатакан биологи сооруженийĕсене туса пĕтермелле.

М.АНДРЕЕВ.