Комментари хушас

Ача-пăча юррисен паллă авторĕ Юрий Энтин ертсе пынипе Мускаври Балакирев ячĕллĕ ача-пăча ÿнер шкулĕн концерт залĕнче "Чунга-чанга" фестиваль иртнĕ.

Финала хутшăннисен йышĕнче пирĕн ентеш, Комсомольскинчи ача-пăча ÿнер шкулĕнче вĕренекен Ксения Гришина та пулнă. И.Спиридонова класĕнче музыка енĕпе пултарулăхне аталантаракан хĕрача фестивальре икĕ юрă шăрантарнă. "Вечная музыка", "Ария Русалочки" - Е.Крылатов композиторпа Ю.Энтин çырнă çĕнĕ хайлавсем. Халĕччен вĕсене никам та юрламан. Ксенийăна жюри уйрăмах тимлĕн итленĕ. Тăрăшуллă чăваш хĕрачине I степень Дипломпа чысланă.

Мускав хулипе облаçĕнчи, Новосибирск, Курган, Тверь, Самар тăрăхĕнчи солистсемпе ансамбльсем хутшăннă фестивальтен çĕнтерÿпе таврăннă çамрăк ентешĕмĕре эпир те чунтан саламлатпăр.

В.МИРСКАЯ.