Комментари хушас

Чÿк уйăхĕн 7-мĕшĕнче Чăваш Республикин Министрсен Кабинечĕн Председателĕ Иван Моторин Улатăр районĕнчи Чуварлей тата Канаш районĕнчи Шăхасан салисенче ача сачĕсем уçма хутшăннă. Шкул çулне çитменнисен учрежденийĕсене Чăваш Республикин 2012-2020 çулсенче «Вĕренĕве аталантарасси çинчен» патшалăх программипе килĕшÿллĕн федераци, республика тата вырăнти бюджетсен укçи-тенкипе тунă.

Чуварлейре ача сачĕ уçма 61 млн тенкĕ тăкакланă. Садик 80 ачана йышăнма пултарать. Учрежденире шкул çулне çитменнисем валли пурте пур: гимнастика тата музыка занятийĕсем ирттермелли зал, медицина блокĕ, ку чухнехи апат-çимĕç блокĕ, прачечнăй. Ача-пăча сĕтел-пуканĕ, сенсор пÿлĕмĕ валли оборудовани, çул-йĕр правилисене вĕренмелли çемçе модульсем, спорт тата музыка оборудованийĕ вырнаçтарнă.

Канаш районĕнчи Шăхасанта ача сачĕ валли унччен шкул пулнă, юсаса çĕнетнĕ икĕ хутлă кирпĕч çурта уйăрса панă. Унта 92 ача çÿрет. Çурта юсаса çĕнетме 38,7 млн тенкĕпе усă курнă. Ача садĕнче музыка тата гимнастика занятийĕсем ирттермелли зал, методика кабинечĕ, апат-çимĕç блокĕ, медицина кабинечĕ тата ытти те пур.

ЧР Правительствин Председателĕ палăртнă тăрăх - юлашки çулсенче республика шкул çулне çитменнисен ыйтăвĕсемпе пикенсех ĕçлет. 2011-2013 çулсенче 3870 вырăнлăх 23 ача сачĕ туса лартнă, юсанă тата туяннă. Çак тĕллевсемпе 1 млрд та 649 млн тенкĕ уйăрнă. Кăçал тата 14 вырăнта ача сачĕсем хута ярĕç.

А.ВАСИЛЬЕВА