Комментари хушас

Паян Шупашкарти Стрелоксен 324-мĕш дивизийĕ урамĕнче вырнаçнă Социаллă пулăшу паракан комплекслă центршăн асра юлмалли кун пулчĕ. Кунта харăсах икĕ центр уçăлчĕ. Çемье нумай функциллĕ центрĕпе «Манăн социаллă центр» клуб хутлăхĕ алăкĕсене яриех уçрĕç.

Мероприятие ЧР ĕçлев тата социаллă хÿтлĕх министрĕ Алена Елизарова, ЧР Министрсен Кабинечĕн Председателĕн çумĕ — сывлăх сыхлавĕн министрĕ Владимир Степанов хутшăнчĕç.

Малтанах вĕсем çĕнĕ центрсемпе паллашрĕç. Çемье центрĕнче тĕрлĕ ÿсĕмри ачасем валли вылямалли лапам пур. Тепĕр пÿлĕмре – медиастуди вырнаçнă. Унта çÿрекенсем тĕрлĕ конкурса хутшăнĕç. Юнашар пÿлĕмре çемьесене социаллă пулăшу паракан пай вырнаçнă. Ятарласа хатĕрленĕ специалистсем çемьене пур енлĕ пулăшу парĕç.

«Манăн социаллă центр» клуб хутлăхĕнче «пултарулăх мастерскойĕ», «компьютер тĕнчи», «шăпăрт гостинăй», «медиа гостинăй» кĕтессем пур. Пухăннисем тĕрлĕ вăйă, сăмахран, шахматла вылятчĕç. «Кĕмĕл волонтерсем» ÿкерÿ ăсталăхне аталантратчĕç тата ятарлă çар операцине хутшăнакан салтаксем валли маскировка сетки çыхатчĕç.

«Çемье нумай функциллĕ центрĕ маларах Шупашкарта Кăнтăр-Хĕвел анăç районĕнче тата Канашра уçăлнăччĕ. Ку — шучĕпе виççĕмĕшĕ. Çулталăк вĕçлениччен çакăн пек центр Вăрмарта та ĕçлеме пуçламалла. Çак центр Çемье çулталăкĕнче уçăлни питĕ пĕлтерĕшлĕ. Кунта кирек епле çемье те килме, кирек хăш ыйтăва та татса пама пултарĕ. «Манăн социаллă центр» клуб хутлăхĕнче аслă ăрурисем хăйсен пуян опычĕпе паллаштарĕç, пĕр-пĕринпе хутшăнĕç», - палăртрĕ Алена Геннадьевна.

Василий Кузьмин сăн ÿкерчĕкĕсем

www.hypar.ru