Комментари хушас

Чăваш Ен Пуçлăхĕ Олег Николаев ирттерекен тунтикунхи канашлура калаçу çак кунсенче иртнĕ пысăк мероприятисем тавра пулчĕ. Спорт министрĕ Василий Петров патшалăхăн физкультурăпа спорт аталанăвĕшĕн яваплă органĕсене туса хунăранпа 100 çул çитнине халалланă ĕçсем çинчен каласа кăтартрĕ. Пăнчă ларман-ха — юбилей çулталăкĕ малалла пырать. Çак тапхăрта ветерансене, спортра паллă йĕр хăварнă ентешсене чыслас тĕлĕшпе тимлĕх уйрăмах пысăк пулмалла.

Культура министрĕ Светлана Каликова «Тĕрленĕ Раççей» фестиваль çинчен каласа пачĕ. Унта Раççейĕн 70 субъекчĕ хăйсен регионĕсен тĕрленĕ карттисене тăратнă, çĕршывăн тĕрлĕ кĕтесĕнчи 160 тĕрĕ ăсти хутшăннă. Тĕрĕ куравне 4 пин ытла çын пырса курнă. Олег Николаев Чăваш Енĕн тĕрĕпе çыхăннă хастар ĕçне тăсмалли çинчен каларĕ — çак пуçарулăха çӳллĕ шайра тытас тĕлĕшпе çĕнĕ çул-йĕр шырамалла. Калăпăр, тĕрре кĕвĕпе çыхăнтарасси... Тепĕр сĕнӳ те пачĕ: Тĕрĕ кунĕ тĕлне тĕрленĕ тумтир çĕлеттерес. Хăй енчен ирĕксĕрленĕ пек ан пултăр тесе министра çак пуçарăва халăхпа сӳтсе явма сĕнчĕ.

Шупашкар администрацийĕн пуçлăхĕ Денис Спирин Хула кунне уявланине пысăка хурса хакларĕ. Праçнике, унпа çыхăннă мероприятисене пĕтĕмпе 300 пин çын патнелле хутшăннă. Шупашкарта иккĕмĕш хут иртнĕ «Раççейĕн симĕс ылтăнĕ» фестивале хутшăнакан та йышлă пулнă. Хăйсен сăрипе 21 компани паллаштарнă. Ял хуçалăх министрĕ Сергей Артамонов сăрапа хăмла уявĕ ăнăçлă иртнине цифрăсемпе çирĕплетрĕ: пĕр эрнене тăсăлнă фестивальте 52 пин литр сăра, 17 пин литр алкогольсĕр шĕвек сутнă. Фестиваль хăнисем çавăн пекех 6 вăкăр пусса хатĕрленĕ, 9 тонна шашлык çисе янă.

Симĕс ылтăн темине пĕтĕмлетнĕ май Олег Николаев хăмлапа ытларах та ытларах инвестор кăсăкланнине çирĕплетрĕ. Çавна май вĕсем валли çĕр лаптăкĕсем уйăрас тĕлĕшпе паянах çине тăрса ĕçлемелле, фермерсене çак культурăна çитĕнтерме явăçтарасси те кун йĕркинче пулмалла. «Пурин валли те ĕç çитет», — терĕ Олег Алексеевич влаç тытăмĕсен çак ĕçе тивĕçтемелли йышăнусене маларах тумалли пирки асăрхаттарнă май.

www.hypar.ru