Комментари хушас

Тунтикунхи канашлура культура министрĕ Светлана Каликова архивсен ĕçне йĕркелес ыйтупа сăмах илчĕ. Муниципалитет округĕсем йĕркеленине, ял тăрăхĕсем пĕтнине кура вĕсен докуменчĕсене архива упрама памалла. Анчах районсен архивĕсем резинăран мар — хăшĕсем 100% тулнă. Хушма пÿлĕмсем уйăрассине тивĕçтермелле. Тепĕр енчен, архивсенче çынсем çителĕксĕр. Хăш-пĕр районта — пĕрер кăна. Министр штатсене пысăклатма ыйтрĕ. Комсомольскинче ку енĕпе тивĕçлĕ йышăну тума хатĕр-мĕн — хальччен пĕр çын ĕçленĕ, тепĕр çынна йышăнаççĕ.

Тема тавлашу çуратасса кĕтменччĕ, анчах финанс министрĕ Михаил Ноздряков сăмах ыйтрĕ. Вăл культура министрĕн сĕнĕвне татăклăн тиркерĕ. Пĕрремĕшĕнчен, «пирĕн муниципалитетсене çапла хистемешкĕн ирĕк çук». Тепĕр енчен, ял тăрăхĕсен докуменчĕсене вырăнтан вырăна куçарма кирлех-и? Документсем тăрăх алăран алла пама, çав вăхăтрах вĕсене хальччен упраннă вырăнсенчех хăварма юрамасть-им? Çийĕнчен вăл хутсене цифрăлас енĕпе ытларах ĕçлеме чĕнсе каларĕ: документсен çаврăнăшне чакармалла – хут ытла та нумай.... Архивсен ĕçченĕсен штатне пысăклатассине те вăл сивлерĕ.

Светлана Каликова ĕç-пуçа уçăмлатас терĕ. Вăл каланă тăрăх, документсене архивра упрасси — саккун хушни. Электрон кописем юридици вăйĕнче тăмаççĕ, çапла тăвас тесен вĕсене копилесе тата чăн документпа танлаштарса ĕнентермелле. Вăт, архив çинчен калакан саккуна улшăнусем кĕртсен — урăхларах пулĕ... Олег Николаев хушша кĕчĕ — Светлана Каликовăна пÿлчĕ: «Пире ликбез кирĕ мар — ахаль те пĕлетпĕр...» Вăл культура министрĕн аргуменчĕсем уçăмлă пулнине палăртрĕ, çав вăхăтрах финанс министрĕ калани те тĕрĕс. Федерацин архивсен ĕçне йĕркелекен саккунне çĕнетме хатĕрленни паллă — ăна темиçе самант кăна тытса тăрать. Анчах çав саккуна йышăнсан архив ĕçĕ тĕпрен улшăнасси иккĕленÿсĕр. Çавăнпа вăл культура министрне çав улшăнусене пурнăçламашкăн халех хатĕрленме пуçлама сĕнчĕ. Документсене унталла-кунталла турттарассине хирĕçлерĕ, хутсене цифрăлас ыйтăва тишкерме сĕнчĕ. Муниципалитетсене архивсене пысăклатма, штатсене ÿстерме хушусем пама тăнине те Олег Алексеевич пусăм тусах сивлерĕ.

www.hypar.ru