Комментари хушас

Коммуналлă пулăшу ĕçĕсен, ресурссен тарифĕсем пысăкланни ЧР Пуçлăхĕ ĕç тăвакан влаç органĕсен тата муниципалитетсен ертÿçисемпе тунтикунсерен ирттерекен канашлура тишкернĕ темăсенчен пĕри пулчĕ.

Тариф службин ертÿçи Надежда Колебанова пĕлтернĕ тăрăх, Раççей Правительстви тарифсен индексацийĕн вăхăтне çур çул маларах куçарнă — çитес çулхи утă уйăхĕнче пулмалли индексаци раштавăн 1-мĕшне куçать. Вăл çулталăк çурăлăх пулать. Урăхла каласан черетлĕ индексаци 2024 çулхи утă уйăхĕн 1-мĕшĕнче кăна пулĕ.

Тарифсен ÿсĕмне 9% шайĕнче чикĕленĕ, çак виçерен 2% ытла иртме юраманнине çирĕплетнĕ. Чăваш Ен Пуçлăхĕн указĕпе республикăра индексацие 23 муниципалитетшăн 9% таран тесе палăртнă, Шупашкар муниципалитет округĕнче — 11% таран /ку Ишлейри тарифсемпе сăлтавланнă-мĕн/. Çапла вара, калăпăр, Çĕнĕ Шупашкарта виçĕ çын пурăнакан, 59 тăваткал метрлă икĕ пÿлĕмлĕ хваттерĕн коммуналлă тÿлевĕсен пĕтĕмĕшле виçи раштавран 287 тенкĕ хушăнĕ. Шупашкарта иккĕн пурăнакан, 52 тăваткал метрлă хваттершĕн 385 тенкĕ ытларах тÿлеме тивĕ.

Надежда Владимировна палăртрĕ: тарифсем пысăкланаççĕ пулин те вĕсен республикăри виçи пурпĕр Атăлçи округĕнчи регионсенчипе танлаштарсан пĕчĕкрех шайра пулать. Ăшă энергийĕн тата коммуналлă хытă каяшсен — чи пĕчĕккисем, сивĕ шывпа электричествăн — аялтан иккĕмĕш вырăнта.

Финанс министрĕ Михаил Ноздряков коммуналлă тÿлевсем тĕлĕшпе патшалăх пулăшăвĕпе усă куракан граждансен йышĕ пысăкки çинчен каларĕ — çак пулăшу малашне те пулĕ. Кăçалхи бюджетра ун валли 883 миллион тенкĕ пăхса хăварнă, çав шутран 688 миллионне граждансене тÿленĕ ĕнтĕ. Тата 200 миллион тенкĕ патнелле юлнă — çынсене пулăшас енĕпе чăрмав пулмĕ. Çитес çул валли вара çак пулăшу виçи тата та пысăкрах пулĕ — 1,25 миллиард тенкĕ патнелле.

ЧР Пуçлăхĕ Олег Николаев индексаци çулталăк çурăлăх пулнине «позитивлă самант» тесе хакларĕ. Ун шучĕпе, тарифсем пысăкланнине кура патшалăх пулăшăвне тивĕç граждансен йышĕ татах пысăкланма пултарĕ. Çавăнпа вăл Ĕçлев министерствине ку енĕпе тимлĕ пулмалли, пулăшу илессине çынсемшĕн май пур таран ансатлатмалли пирки асăрхаттарчĕ. Çав шутра — пухмалли документсен шутне чакарасси те. Çавăн пекех Олег Алексеевич Тариф службине ку ыйтупа çывăх вăхăтрах тÿрĕ лини ирттерме сĕнчĕ — çынсене мĕнле ыйтусем пăшăрхантарнине курса хаклама май пулĕ.

www.hypar.ru