Комментари хушас

Паян ЧР Правительство çуртĕнче оперштабăн черетлĕ ларăвĕ иртрĕ. Унăн ĕçне ЧР Пуçлăхĕ Олег Николаев ертсе пычĕ.

«Статистика ковидпа чирлекенсен йышĕ кăшт чакса пынине палăртать. Çав вăхăтрах кӳршĕ регионсенче омикрон-штамм ернисем хушăнсах пыраççĕ. Çавăнпа йăлана кĕнĕ пек сыхлав мерисене пăхăнмалла: маскăпа çӳремелле, дезинфекци тумалла, мероприятисене QR-код пуррисене кăна кĕртмелле», - терĕ ларура Олег Николаев. Олег Алексеевич палăртнă тăрăх, çулталăкăн юлашки эрнинче халăх лавккасене, концертсемпе кафесене ытларах çӳрĕ. Çавăнпа çирĕп мерăсем йышăнмалла. «Чылай çĕрте QR-кодсене ячĕшĕн кăна тĕрĕслеççĕ. Ун пек тума юрамасть», - шухăшне палăртрĕ регион Пуçлăхĕ. Олег Алексеевич шкул ачисене хĕллехи каникула маларах ярасси, кану кунĕсене ытларах тăсасси пирки те сăмах пуçарчĕ. ЧР вĕрентӳ тата çамрăксен политикин министрне Дмитрий Захарова çак ыйтăва тунтикунхи планеркăччен пăхса тухма ыйтрĕ.

Ларура палăртнă тăрăх, паянхи кун тĕлне республикăра 993 çын стационарсенче ковидран сипленет. Вĕсенчен 44-шĕ йывăр чирлĕ. 1721 çын — амбулатори сиплевĕнче. Вĕсенчен 365-шĕ – 65 çултан иртнĕ. Паянхи кун тĕлне гриппа чирленĕ 19 тĕслĕхе шута илнĕ. Çĕмĕрле, Çĕнĕ Шупашкар хулисенче тата Шăмăршă, Çĕмĕрле, Красноармейски районĕсенче грипран прививка тутаракансем сахал.

www.hypar.ru