Чăвашла верси
Русская версия
Сивĕ хĕл те ăшă пултăр
Коронавирусран сыхланасси тунтикунхи канашлусенче кашнинче тенĕ пекех çĕкленет — ку хутĕнче те çаплах пулчĕ. Чăваш Ен Пуçлăхĕ Олег Николаев инфекцин çĕнĕ штамĕ — омикрон — пысăк хăрушлăх кăларса тăратнă май сыхлăха çухатма юраманни çинчен тепĕр хут аса илтерчĕ. Раççее вăл сарăлнă çĕршывсенчен çынсем килеççĕ — пире пырса тивмĕ-ха теме çук. Çĕнĕ çул çывхарнă май халăх миграцийĕ пысăкланать — пушшех асăрханмалла.
Олег Алексеевич общество апатланăвĕн предприятийĕсен праçник кунĕсенчи ĕçĕпе çыхăннă чарусем тĕлĕшпе тивĕçлĕ йышăну тумалли çинчен каларĕ, оперативлă штабăн ытларикунхи ларăвĕ тĕлне ку енĕпе сĕнӳсем хатĕрлеме хушрĕ.
Çурт-йĕре хутса ăшăтмалли тапхăр йĕркелĕвĕ пирки строительство министрĕн тивĕçĕсене пурнăçлакан Владимир Максимов сăмах илчĕ. Çуртсене ăшă парассине кăçал иртерех, авăн уйăхĕн варринче, пуçланă. Пĕтĕмпех йĕркеллĕ, анчах пилĕк муниципалитет — Шупашкар, Шăмăршă, Комсомольски районĕсем, Шупашкар тата Çĕнĕ Шупашкар хулисем хатĕрлĕх паспорчĕсене илеймен. Вĕсен ертӳçисем çакăн сăлтавĕсене ăнлантарчĕç: муниципалитетсен паспортсем çукки ăшăпа тивĕçтерекен уйрăм объектсен ĕçне чăрмантармасть — вĕсем ĕçлеççĕ.
Энерги ресурсĕсемшĕн тӳлессипе çыхăннă парăмсен ыйтăвĕ вара чылай çивĕчрех — ЖКХ организацийĕсем ăшăшăн, газшăн, электричествăшăн тӳлемен виçе 2,4 миллиард тенкĕрен те иртет. Газ парăмĕсене татас енĕпе график тунă, анчах нумай муниципалитет ăна пурнăçлаймасть. Унтан та ытла — хăшĕсем уйăхсерен хывмалли тӳлевсене те тивĕçтереймеççĕ. Олег Николаев кунашкаллипе çырлахма юраманни пирки асăрхаттарчĕ: «Пирĕн ресурссемшĕн тӳлес тĕлĕшпе шанчăклă ĕçтеш статусне упраса хăвармалла, мĕншĕн тесен çакă модернизаци планĕсемпе, пысăк поставщиксем пире ăнланассипе тӳррĕнех çыхăннă…» Олег Алексеевич парăмăсене чакарас енĕпе мерăсем йышăнма хушрĕ — «пирĕн çапла тумалли майсем пур».
Патшалăх пурăнмалли çурт-йĕр инспекцийĕн ертӳçи Виктор Кочетков çуртсене ăшăпа тивĕçтерессине тимлĕ сăнаса тăнине çирĕплетрĕ. Сăмах май, ку енĕпе çĕнĕлĕх вăя кĕнĕ. «Сивĕ пилĕк кун» текен ăнлав пур. Пирĕншĕн вăл хальччен 29 градуслă сивĕпе танлашнă — хваттерсенчи вăтам температура 20-22 градус пулмалла. Çак виçене чакарнă-мĕн — 18-20 градус шайĕнче çирĕплетнĕ. Çавна май граждансенчен шăнкăрав чылай — инспекцин ăнлантарма тивет.
