Комментари хушас

Чăваш Енре нумай антителăллă граждансене куар-код памалли ятарлă система ĕçлеме пуçлассине пĕлтерчĕç коронавирус сарăлассине чарас енĕпе ĕçлекен оперативлă штабăн черетлĕ ларăвĕнче.

Антителăсен шучĕ 300-500 пулмалла. Ăна юн анализĕ илсе палăртĕç. Антителăсен йышĕ 250-ран сахалрах тăк прививка тума тивĕ. Анчах ку система патшалăх пулăшăвĕсен порталĕнче пулмĕ, пирĕн республикăра кăна ĕçлĕ. ЧР Пуçлăхĕ Олег Николаев каланă тăрăх, Европа стандарчĕпе килĕшӳллĕн антителăсен шучĕ 300-тен пысăк пулни чиртен хӳтĕлет. «Нумай антителăллисем вакцинаци тутарасшăнах мар. Вĕсен иммун тытăмĕ çирĕп, анчах вĕсене куар-кодсăр ниçта та кĕртмеççĕ», — терĕ регион ертӳçи.

Сывлăх сыхлавĕн министрĕн пĕрремĕш заместителĕн тивĕçĕсене пурнăçлакан Алексей Кизилов каланă тăрăх, стационарта — 2520, килте 5239 çын сипленет. «Телее, больницăна лекекенсен йышĕ пысăк мар, нумайăшĕн чир çăмăллăн аталанать. Кислород та çителĕклех, пĕр кунра 30 тонна çителĕклĕ», — терĕ Алексей Владимирович. ОРВИпе чирлекенсен йышĕ те чакнă, юлашки вăхăтра 3000 ытла /иртнĕ уйăхсенче 6000-8000 пулнă/ тĕслĕхе шута илнĕ. Прививка тутаракансен шучĕ сахал мар. Пĕр талăкра вакцинаци пунктне вăтамран 4400 çын пынă. Хальлĕхе республикăра вакцинациленекенсен йышĕ 63 процентпа танлашнă. Ытларах «Спутник V» вакцинăпа прививка тутарнă. Çывăх вăхăтра тепĕр 6000 доза кӳрсе килмелле. Ют çĕршывран килнисем те вакцинаци тăваççĕ, 500 çын тутарнă.

Роспотребнадзорăн Чăваш Енри управленийĕн ертӳçи Надежда Луговская пĕлтернĕ тăрăх, специалистсем куллен рейда тухаççĕ. Иртнĕ эрнере 1400 обьекта тĕрĕсленĕ, чылай çитменлĕх тупса палăртнă, 40 протокол çырнă. Суту-илӳ предприятийĕсенче дезинфекци тумаççĕ, сывлăша тасатакан хатĕрсем çук, куар-кодсене касса умĕнче кăна тĕрĕслеççĕ. Олег Николаев йĕркене пăсакан лавккасен ĕçне вăхăтлăха чарса лартма хушрĕ.

www.hypar.ru