Чăвашла верси
Русская версия
Ачасен тӳлевсĕр апатне республика бюджечĕ саплаштарĕ
Республикăра пурăнакан нумай çемьене пырса тивекен ыйту — шкулсенче ачасене тӳлевсĕр апатлантарма укçа уйăрасси. Ун пирки Министрсен Кабинечĕн юнкун ЧР Пуçлăхĕ Олег Николаев ертсе пынипе иртнĕ ларăвĕнче сăмах пулчĕ.
Министрсен Кабинечĕ укçа уйăрмалли правилăсене çирĕплетрĕ, патшалăхăн «Вĕрентĕве аталантарасси» программине улшăнусем кĕртессине ырларĕ. Вĕрентӳ министрĕ Алла Салаева пĕлтернĕ тăрăх, документа ЧР Пуçлăхĕн нумай ачаллă çемьесен пурнăç шайне çĕклесси çинчен калакан указĕпе килĕшӳллĕн хатĕрленĕ. Республика бюджечĕ тăкаксене хăйĕн çине илет — муниципалитетсен бюджечĕсене укçа куçарса парĕ. Шкулсенче нумай ачаллă сахал тупăшлă çемьесенчи 5-11 классенче вĕренекен ачасене тӳлевсĕр вĕри апат çитерĕç. Вĕсене шута илнĕ: çĕртме уйăхĕн 1-мĕшĕ тĕлне Чăваш Енри çакнашал çемьесенче 11,5 пине яхăн ача шутланнă.
