Комментари хушас

Коронавирус сарăлассине чарас енĕпе ĕçлекен оперативлă штабăн черетлĕ ларăвĕ иртрĕ. Ăна ЧР Пуçлăхĕ Олег Николаев ертсе пычĕ. Вăл палăртнă тăрăх, лару-тăру йывăрланса пырать, чирлекенсен шучĕ ӳсме тытăннă. «Короновирусăн штамĕсем вăй илнĕ май чирлесе ирттернисене те, антитела пуррисене те ерме пултарать. Инфекцирен вакцинаци кăна хӳтĕлеет», — терĕ вăл.

Сывлăх сыхлавĕн министрĕн çумĕн тивĕçĕсене пурнăçлакан Алексей Кизилов пĕлтернĕ тăрăх, хальхи вăхăтра стационарта коронавирусран 1400 çын сипленет, вĕсенчен 18-шĕ — ИВЛ аппаратпа сывлать. 2200 çын килте медпулăшу илет. Чирлекенсен шучĕ ӳснĕ май республикăри туберкулез диспансерĕнче, Шупашкар хулинчи 2-мĕш тата Шупашкар районĕн тĕп больницинче хушма койкăсем хатĕрленĕ. Пациентсемпе ĕçлемешкĕн 111 ординатора тата 339 студента явăçтарнă. Коронавируспа нушаланакансенчен 54 проценчĕ — аслă ӳсĕмри çынсем, анчах юлашки вăхăтра çамрăксем те чирлеме тытăннă. Республикăра вакцинацин 56 пункчĕ ĕçлет. Вĕсем пациентсене канмалли кунсенче те йышăнаççĕ. Хальлĕхе 140000 çын /вĕсенчен 70 пинĕшĕ — 60 çултан иртнисем/ прививка тутарнă. Алла Салаева вице-премьер сăмахĕпе, вакцинаци тăвас енĕпе Красноармейски, Канаш, Хĕрлĕ Чутай, Вăрнар, Сĕнтĕрвăрри районĕсем, Улатăр хулипе районĕ малта пыраççĕ. Министерствăсемпе вĕсене пăхăнса тăракан организацисенче ĕçлекен 18 пин ытла çын прививка тутарнă.

Роспотребнадзорăн Чăваш Енри управленийĕн пуçлăхĕ Надежда Луговская пĕлтернĕ тăрăх, коронавируспа Шупашкар хулинче /48 процент/, Улатăр хулинче, Вăрнар, Красноармейски, Пăрачкав районĕсенче ытларах чирлеççĕ. Уйрăмах офиссенче, банксенче, культура учрежденийĕсенче тăрăшакансене чир ернĕ. Чăваш Енре Британи тата Инди штамĕсем /9 тата 6 тĕслĕх/ тупса палăртнă. Роспотребнадзор массăллă мероприятисене сахаллатма, апатлану предприятийĕсен ĕç вăхăтне /çĕрле 1 сехетрен пуçласа ирхи 6 сехетчен/ кĕскетме, фудкортсен ĕçне, ташă каçĕсем ирттерекен вырăнсене вăхăтлăх чарма, курав залĕсемпе кинотеатрсене пыракансен шутне 50 процент чакарма, 60 çултан аслăраххисене тата ача кĕтекен амăшсене дистанци мелĕпе ĕçлемешкĕн куçарма сĕнет. Çавăн пекех общество апатланăвĕн предприятийĕсенче ковидсăр зонăсем тума палăртнă: кафе-ресторансене прививка тутарманнисене тата коронавирус çуккине ĕнентерекен справкăсăр кĕртме пăрахĕç.

www.hypar.ru