Комментари хушас

Паян Правительство çуртĕнче Республика кунне хатĕрленсе ирттерес енĕпе ĕçлекен йĕркелӳ комитечĕн ларăвĕ пулчĕ.

Чăваш Енĕн паллă та пĕлтерĕшлĕ уявне çулленех сумлă ирттереттĕмĕр, унта республика çыннисемсĕр пуçне çĕршывăн тĕрлĕ кĕтесĕнче пурăнакан йăхташсем, республикăн ĕçлĕ партнерĕсем хутшăнатчĕç. Иртнĕ çул, паллă сăлтавсене пула, Республика кунне онлайн мелĕпе йĕркелеме тиврĕ.

Кăçал вара, Роспотребнадзор ыйтакан условисене тĕплĕн шута илсе, уява яланхиллех паллă тума тĕв тытнă.

Канашлăва ЧР Пуçлăхĕ Олег Николаев ертсе пычĕ. Олег Алексеевичăн шухăшĕпе, уявпа çыхăннă мероприятисене «Пĕрле Ниме» чĕнӳпе йĕркелени питĕ тĕрĕс. Пĕлтĕр «Пĕрле» чĕнӳпе пĕр чăмăра пĕрлешрĕмĕр, кăçал вара чăвашсен нимине тĕпе хурса пурте пĕрле çине тăрса ĕçлемелле.

Культурăпа çыхăннă мероприятисем пирки ЧР культура министрĕ Светлана Каликова каласа кăтартрĕ. Акатуйсем республикăра çĕртмен 1-23-мĕшĕсенче иртĕç, Пĕтĕм чăвашсен 9-мĕш Акатуйĕ вара — çĕртмен 24-мĕшĕнче тĕп хулари «Амазони» этнокомплексра. Йăлана кĕнĕ Пĕтĕм Раççейри «Раççей çăл куçĕсем» 29-мĕш фестиваль, «Руç ăстисем» 19-мĕш конкурс хăйĕн кураканĕсене савăнтарĕ. Пĕтĕм тĕнчери кинофестиваль те кăçал республика кунне уявланă тапхăрта иртĕ. Унсăр пуçне «Ентешсен çăлтăр ушкăнĕ» фестиваль иккĕмĕш хут Шупашкара таврăнĕ.

ЧР Министрсен Кабинечĕн Председателĕн заместителĕ-экономика аталанăвĕпе пурлăх хутшăнăвĕсен министрĕ Дмитрий Краснов Шупашкарти экономика форумĕн, регионсен хушшинчи «Регионсем — чикĕсĕр хутшăнура» куравăн, наци кухнин «Тараватлă Чăваш Ен» фестивалĕн тата фейерверксен «Асамат» фестивалĕн кăçалхи хăй евĕрлĕхĕсемпе паллаштарчĕ.

www.hypar.ru Надежда СМИРНОВА сăн ӳкерчĕкĕ