Комментари хушас

Коронавирус сарăлассине чарас енĕпе ĕçлекен оперативлă штабăн черетлĕ ларăвĕ иртрĕ. Ăна ЧР Пуçлăхĕ Олег Николаев ертсе пычĕ.

Сывлăх сыхлавĕн министрĕ Владимир Степанов пĕлтернĕ тăрăх, хальхи вăхăтра стационарта 841 çын медпулăшу илет, вĕсенчен 495-шĕ — 60 çултан иртнисем. 1458 çын килте сипленет, 141 çын санаторисенче реабилитаци тухать. 79322 çын прививка тутарнă. Канмалли кунсенче куçса çӳрекен вакцинаци пункчĕсем ĕçлеççĕ. Калăпăр, «Шупашкар» суту-илӳ центрĕ патĕнчи пункта пĕр кунра 25 çын пынă. Организаци-предприятисенче те прививка тăвасси вăй илсех пырать. Акă «Лента» пĕрлешӳре ĕçлекен 500 ытла çын прививка тутарнă.

Роспотребнадзорăн Чăваш Енри управленийĕн пуçлăхĕн çумĕ Вера Головач пĕлтернĕ тăрăх, коронавируспа чирлекенсен шучĕ Патăрьел, Вăрнар, Канаш, Куславкка, Çĕрпӳ районĕсенче ытларах ӳснĕ. Уйрăмах 50-70 çулсенчи çынсем нушаланаççĕ. Юлашки кунсенче ОРВИпе чирлекенсен шучĕ 13 процент ӳснĕ, пневмонипе 10 процент ытларах аптăрама тытăннă. «Çамрăк журналистсен «Атăлçи тĕлпулăвĕсем» фестиваль иртнĕ. Унта малтанлăха палăртнă тăрăх, 150 çын хутшăнассине пĕлтернĕ, анчах вĕсен шучĕ 300 яхăн пулнă. Унта чир сарăлас хăрушлăх пысăк пулнă», — терĕ Вера Михайловна. Çавна май Роспотребнадзор ачасемпе çыхăннă мероприятисене онлайн мелпе ирттеме сĕнет. Олег Николаев каланă тăрăх, фестивальте асăрханулăх мерисене çирĕп пăхăннă, ют регионтан килнисем тест тутарнă. Çавăн пекех санитари врачĕ пĕлтернĕ тăрăх, Мăнкун кĕллисенче маска тăхăнман тĕслĕх нумай пулнă. Сăмах май, Мăнкун кĕллисем 187 чиркӳре иртнĕ, вĕсене 13 пин ытла çын хутшăннă. Çу уйăхĕн 11-мĕшĕнче Ваттисене асăнмалли кун, Радоницăра, Шупашкарпа Çĕнĕ Шупашкарта пурăнакансем масарсене кайнă май ятарлă службăсене сыхă пулма хушрĕç. Çĕнтерӳ кунне халалланă парада 1000 ытла çын хутшăнĕ, вĕсене пурне те тест тăвĕç. Парада телевизорпа пăхма пулать.

www.hypar.ru