Чăвашла верси
Русская версия
Ют çĕршывран таврăнакансене тĕрĕслеççĕ
Правительство çуртĕнче коронавирус инфекцийĕ сарăлассине чарас енĕпе ĕçлекен ятарлă штабăн черетлĕ ларăвĕ иртрĕ. ЧР Пуçлăхĕ Олег Николаев ют çĕршывсенче чир тепĕр хут вăй илме пуçланине, пирĕн регионта та лару-тăру хуть те хăш самантра та улшăнма пултарнине, çавна май чикĕ леш енчен таврăнакансене сăнаса тăмаллине палăртрĕ. Çавăн пекех обществăлла вырăнсене дезинфекци тăвас ĕçе вăйлатма хушрĕ.
Роспотребнадзорăн Чăваш Енри управленийĕн пуçлăхĕн заместителĕ Вера Головач каланă тăрăх, ют çĕршывран килекенсене куçран вĕçертмеççĕ. «Вĕсен ятарлă правилăсене пăхăнма тивĕç, унсăрăн явап тытма тивĕ. Сăмахран, йĕркене пăснисен тĕлĕшпе кăçал 105 протокол çырнă», — терĕ Вера Михайловна. Юлашки вăхăтра çитĕннисен хушшинче коронавируспа чирлекенсен йышĕ чакнă пулин те Улатăр, Куславкка, Елчĕк, Хĕрлĕ Чутай районĕсенче инфекциллисен шучĕ ытларах пулнă. Яланхи пекех коллективсемпе çемьесенче пĕрер-икшер тĕслĕх тупса палăртнă. ОРВИпе сахалрах чирлеççĕ тĕк пневмониллисен йышĕ 7 процент пысăкланнă.
Сывлăх сыхлавĕн министрĕн пĕрремĕш заместителĕн тивĕçĕсене пурнăçлакан Алексей Кизилов пĕлтернĕ тăрăх, кăçал 7060 çын /342-шĕ — ачасем/ коронавируспа чирленĕ, вĕсенчен 6539-шĕ сывалнă. Хальхи вăхăтра стационарта 786 çын сипленет, вĕсенчен 20-шĕ ИВЛ аппаратпа сывлать. Килте 2358 çын медпулăшу илет. Вĕсене эмелпе тивĕçтереççĕ. Коронавируслисем валли 10 больницăра 1050 койка пур. Вĕсен шутне майĕпен кĕскетсе пыраççĕ. Хальхи вăхăтра 193 çын санаторисенче сипленет. Коронавирус инфекцийĕнчен хӳтĕлекен прививкăна 58060 çын тутарнă. Хастаррисен шутне 55 çултан аслăраххисем кĕнĕ, çамрăксем вакцинаци пунктне сахаллăн килеççĕ: пĕтĕмпе те 2142-ĕн прививка тутарнă.
Цифра аталанăвĕн министрĕ Кристина Майнина икĕ эрнере мобильлĕ ушкăнсем епле ĕçленипе паллаштарчĕ. Вĕсем 4602 хут тĕрĕслеве тухнă, 36 çитменлĕх тупса палăртнă. Ку енĕпе Шупашкар хулисĕр пуçне, Улатăрти, Çĕнĕ Шупашкарти, Çĕмĕрлери тĕрĕслевçĕсем лайăх ĕçленĕ. 122 номерпе çынсем пин ытла хут шăнкăравланă. Вĕсене яланхи пекех вакцинаци ыйтăвĕ кăсăклантарнă, эмелпе епле тивĕçтерни тата тест ăçта туни çинчен ыйтса пĕлнĕ.
