Комментари хушас

17 Утă, 2014

ЙЫВĂР ВĂХĂТРА ЫРĂ ВИТĔМ КŸРЕÇÇĔ

Хĕрарăмсене климаксăн йывăр палăрăмĕсене çăмăллатма эмел курăкĕсем пулăшаççĕ. Вĕсен пуххисемпе пĕр уйăхран кая мар, кирлĕ пулсан ытларах та сипленмелле. Пĕри пулăшмасан теприне суйламалла.

♦5-шер пай шăлан çырлине, лачака тип курăкне /сушеница топяная/, катăркас /боярышник/ чечекĕпе çырлине, сĕлĕ çăнăхне, 4 пай мелисса курăкне, 3,5-шер пай шăши кикенекне /череда трехраздельная/, хăмла пучахне, 3 пай сив курăкĕн /цикорий/ тымарĕпе курăкне, 2,5 пай шĕпĕн курăкне /чистотел/, 2 пай чăрăш тăррине /хвощ полевой/, 0,5 пай укроп вăррине хутăштармалла. 2 апат кашăкĕ пухха термосри тин вĕренĕ çур литр шыва ямалла, пĕр сехетрен сăрăхтармалла. Кунне 8 хут апатчен 15 минут маларах çуршар стакан ĕçмелле.

♦Климакс тапхăрĕнчи ытла та канăçсăр палăрăмсенчен хăтăлма 125 миллилитр кагора 150 грамм пыл тата 100 грамм алоэ сĕткенĕ ярса пÿлĕмри тĕттĕм вырăнта 5-7 кун лартмалла. Кунне 3 хут апатчен 2 чей кашăкĕ-1 апат кашăкĕ ĕçмелле. Сиплев курсĕ - 3-4 эрне.

♦3-шер пай хура катăркас /крушина/ хуппине, упа çырлин /бузина черная/ чечекне, пылак тымара /корень солодки/, 2-шер пай календула чечекне, аслати курăкĕн /фиалка/ чечекне хутăштармалла. 4 апат кашăкĕ чĕр тавара термосри тин вĕренĕ 1 литр шыва ямалла, 1 сехетрен сăрăхтармалла. Ирсерен тата каçсерен 1-ер апат кашăкĕ ĕçмелле.

♦Е тепĕр тĕрлĕ курăксен пуххинчен çак мелпех шĕвек хатĕрлесе ĕçмелле. 3 пай хура катăркас хуппине /варвиттине туртăм пулсан ун вырăнне 3 пай петрушка тымарĕ илмелле/, 2 пай фенхель вăррине, 1-ер чей кашăкĕ пĕтнĕке /мята/, шурă армутине /полынь горькая/ хутăштармалла.

♦Вĕрилентерсен катăркасăн /боярышник/ аптека настойкине кунне 3-4 хут 25-30-шар тумлам ĕçмелле.

♦Пĕр виçепе кушак курăкĕн /валериана/ тымарне, хаяр утине /шалфей лекарственный/, чăрăш тăррине, пĕтнĕке, мелиссана, шурă омелăна, катăркас çырлине илмелле. 1 апат кашăкĕ пухха термосри тин вĕренĕ 1 стакан шыва ямалла, 1 сехетрен сăрăхтармалла. Кунне 2-4 хут çуршар стакан сывлăх лайăхланичченех ĕçмелле.

♦Хытă тарлаттарсан пĕр виçепе илнĕ хаяр утине, пĕтнĕке, чăрăш тăррине хутăштармалла. 1 апат кашăкĕ пухха тин вĕренĕ 1 стакан шыва ямалла, 30 минутран сăрăхтармалла. Кунне 3-4 хут çуршар стакан сывлăх лайăхланичченех ĕçмелле.

♦Пуç ыратсан, ыйхă вĕçсен, кăмăл пусăрăнчăк пулсан 3-шер пай мелиссана, омелăна, 2,5-шер пай сив курăкĕн тымарне, хĕрлĕхен курăкне /кипрей/, 2-шер пай пĕтнĕке, катăркас çырлине хутăштармалла. 1 апат кашăкĕ пухха тин вĕренĕ 1 стакан шыва ямалла, 30 минутран сăрăхтармалла. Кунне 6-8 хут апат умĕн стаканăн виççĕмĕш пайне ĕçмелле.

♦Пуç ыратсан пĕр виçепе илнĕ мелиссана, пĕтнĕке, хĕрлĕхен курăкне, кориандр вăррине хутăштармалла. 2 апат кашăкĕ пухха 0,5 литр спирта тата 20 миллилитр шыва ямалла, пĕр талăкран сăрăхтармалла. Ыратнă чухне унра йĕпетнĕ тутăра тăнлавсем, ĕнсе çине хумалла.

♦Нервсем пăлхансан, ыйхă вĕçсен, депресси, неврастени аптратсан пĕр виçепе илнĕ хăмла пучахне, пĕтнĕке, сар çип утине /зверобой/, мелиссана, кушак курăкĕн тымарне, катăркасăн чечекĕпе çырлине хутăштармалла. 2 апат кашăкĕ пухха тин вĕренĕ 1 стакан шыва ямалла, 15-20 минутран сăрăхтармалла. Кунне 1 стакан сывлăх лайăхланичченех ĕçмелле.

♦Климакс вăхăтĕнче уйăх хушши ыратса килсен 2,5 пай кăвак хăмла çырлин çулçипе чечекне, 2-шер пай ырă шăршăллă ясменникпа чĕре курăкне, 1,5 пай лачака тип курăкне, 1 пай катăркас чечекне хутăштармалла. 1 апат кашăкĕ пухха тин вĕренĕ 1 стакан шыва ямалла, 30 минутран сăрăхтармалла. Кунне 3 хут 1-ер стакан ĕçмелле. Курс - 10 кун, 4-5 кун кансан тепĕр курс ирттермелле.

Image CAPTCHA
Введите символы, которые показаны на картинке.