Комментари хушас

«Вĕсем виççĕн çеç юлчĕç» романăн виççĕмĕш кĕнекинчен

Мĕн ытларах
хĕмлентерет чĕрене —
шанчăклă туслăх, таса юрату.
Урăх ним те мар.
/Йăванка Пожеданов ĕненĕвĕнчен/.
Чăваш чĕлхипе литература вĕрентекенĕ Пожеданов коридор тăрăх унталла та кунталла ик-виçĕ хут иртсе кайрĕ — тăлмачсен кружокĕн членĕсене шырать. Директор кабинечĕ умĕнче тăракан дежурнăя Елизавета Герасимовăна ырă та, усал та чĕнмерĕ. Сăмах хушма-и, ун ен-нелле çаврăнса та пăхмарĕ. Тÿсеймерĕ хĕр, тăнсăр-тимсĕр йĕкĕте ăса кĕртме шухăшларĕ.
— Мĕн пĕр вĕçĕм тăктăмал ĕрĕхсе çÿретĕн? — илтрĕ хĕрĕн кăмăлсăр сассине йĕкĕт. — Чарăн, тăхта кăштах!
Шкул директорĕ пÿлĕмĕнче участок тухтăрĕ пĕр хĕрача сывлăхне тĕрĕслет. Унта дежурнăй никама та кĕртмест, çав вăхăтрах йĕкĕте те куçран вĕçертмест.
— Мĕн пĕр вĕçĕм тăктăмал çÿретĕн? — сассине хăпартрĕ хĕр. Сасартăк яра пачĕ яша вут пуленкипе пĕççинчен.
— Сиен кÿрес шутпа хăтлантăм пулсан çакăнтах çĕр çăттăр мана. Пĕрре иртсе кайрăн ман тĕлтен, тепре хутларăн — ман çинелле çаврăнса та пăхмарăн. Юрать-и ун пек! Арçын ачан хăюллăрах пулмалла. Ак пăчăртам та хам чуп тăвам сана, тăрлавсăра. Йĕкĕт вăтанать пулсан хĕр хăюллăрах пултăр!
— Ăхă, эсир апла хăтланатăр-и-ха?
Сарлака хул-çурăмлă вăйламас Ваня ун-кун пăхрĕ те çывăхра никам та çуккине курсан хĕре йăпăр-япăр йăвантарса ячĕ.
Хĕр куçĕнче каçарма çук ÿпкев.
— Ара, çапрăм çав. Унталла иртрĕн, кунталла кайрăн — ман енне çаврăнса та пăхмарăн...
Хĕр йĕкĕте пĕрре те, иккĕ те тутинчен чуп турĕ. Çав вăхăтрах çирĕппĕн асăрхаттарчĕ: «Мăшăрланиччен мана ан тĕкĕн!»
Çакнашкал асăрхаттару Ваньăна питĕ килĕшрĕ. Çылăха кĕме шухăшламан хĕрпе туслашать эппин. Йĕкĕт шÿтлесе хĕр юбкине хăвăрт сирчĕ. Ай-ай, унта çап-çара та хуп-хура йăран. Лăпăс-лапăс кăткă йăви тейĕн. Тум харри урăх пачах çук. Мĕн курнине йĕкĕт çав самантрах хупларĕ те яшт сиксе тăчĕ, уттарчĕ йăпăртах таçталла.
— Вăт сана ме! Ăна нимĕн те кирлĕ мар иккен! — шалт тĕлĕнчĕ хĕр.
Такăр çултах тумхах тупăнать çав. Автанпа чăх пĕр тăванах, анчах сукмакĕсем яланах пĕр килмеççĕ. Йĕкĕтпе хĕрĕн ашшĕ-амăшĕ пĕрешкел çынсемех, ачи-пăчине вара расна кăмăл-сипетлĕ ÿстереççĕ. Чăваш ачи пĕр урипе сăпкара, теприпе — акара. Вырăс йĕкĕчĕ те чăваш пекех. Вырăс халăхĕн ку хĕрĕ пирки урăхларах калама тивет. Лизăн пĕр ури амăшĕпе юнашар, тепри баян çумĕнче. Малалла вулас...

Иван ТЕНЮШЕВ.
Image CAPTCHA
Введите символы, которые показаны на картинке.