Чăваш картти мĕншĕн çухалчĕ?

Республикăра пурăнакансене хамăр чăваш тăрăхĕн чикки, вăл ăçта тата мĕнле вырнаçнă, унти хула-ялсем, юханшыв-çул-йĕрсем чылайăшне интереслентереççех ĕнтĕ. Епле-ха унсăрăн - хăвăн ене пĕлмесĕр?

Унчченхи вăхăтсенче республика картти таçта та куç умĕнче пулнă: патшалăхăн кирек хăш органĕн кантурĕнче, пуçлăхсен пÿлĕмĕнче, тĕрлĕ хуçалăх правленийĕнче, клуб-библиотекăра, обществăлла вырăнсенче, Хĕрлĕ кĕтессенче - таçта та çакăнса тăнă. Уйрăм çынсен килĕнче те пулнă. Кирлĕ пулсан киоска е почтăна кайса хăвăртах туянма пултарнă. Халĕ чăваш карттине ниçта та шыраса тупаймăн. Илес тесен те - çук. Эпир, аслă пусăмрисем, ăнкаратпăр-ха хăш район, хула, ял ăçта вырнаçнине, анчах хальхи çамрăксенчен, шкул ачисенчен çав хула е ял, район е юханшыв ăçтарах тесе ыйтсан вĕсем калама пултараймĕç, мĕншĕн тесен вĕсем чăваш карттине курман, унпа паллашман.

Ман питĕ пĕлес килет: мĕншĕн халь вĕсене кăлармаççĕ? Питĕ кирлĕ, пуриншĕн те меллĕ те усăллă пулĕччĕ.

Анатолий АЛЕКСЕЕВ.

Вăрнар районĕ,

Хура Çырма ялĕ.