Чăваш хĕрĕсен тÿпи те пур

Литвари Вильнюс хулинче армспорт енĕпе тĕнче чемпионачĕ иртнĕ. Ăмăртура 18 çула çитмен çамрăксем, ветерансем, арçынсемпе хĕрарăмсем тупăшнă. Унта 46 çĕр-шывран 900 ытла спортсмен хутшăннă.

Чемпионатра Чăваш Ен чысне И.Н.Ульянов ячĕллĕ Чăваш патшалăх университечĕн спорт клубĕнче ăсталăха туптакан виçĕ пике хÿтĕленĕ. Вĕсенчен иккĕшĕ "Юниорсем-21" ушкăнра мала тухнă. Турнирăн пĕрремĕш кунĕнче чылай ăмăрту çĕнтерÿçи Олеся Игнатьева сылтăм алăпа вăй виçсе кĕмĕл медаль çĕнсе илнĕ, иккĕмĕш кун чăваш хĕрĕ сулахай алăпа кĕрешсе "бронзăна" тивĕçнĕ. Унăн тусĕ Эльмира Алеева хăйĕн виçинче виççĕмĕш вырăн йышăннă. Пухмача наградăсемпе тепĕр икĕ ентеш, хальхи вăхăтра Мускавра пурăнакан спортсменсем, пуянлатнă. Ирина Кутузова çамрăксен ăмăртăвĕнче пьедесталăн пĕрремĕш картлашки çине хăпарнă, Кристина Тихонова виççĕмĕш кăтартупа палăрнă. Чемпионат пĕтĕмлетĕвĕпе пирĕн çĕр-шыв команди 26 "ылтăн", 34 "кĕмĕл", 33 "бронза" çĕнсе илсе пĕрремĕш вырăна çĕкленнĕ.

Е.АНДРЕЕВ.